'ദാദ മുതല്‍ കോലി വരെ', ഇന്ത്യക്കാരോട് മുട്ടണ്ട, തിരിച്ചടി ഉറപ്പ്, അഞ്ച് സംഭവങ്ങളിതാ

സൗരവ് ഗാംഗുലിയുടെ ലോര്‍ഡ്‌സ് ആഘോഷം

ഇംഗ്ലണ്ടിനെതിരായ നാറ്റ് വെസ്റ്റ് ട്രൈ സീരിസ് പരമ്പര ഇന്ത്യ സ്വന്തമാക്കിയപ്പോള്‍ ലോര്‍ഡ്‌സിലെ ബാല്‍ക്കണിയില്‍ ജഴ്‌സി ഊരി ഇന്ത്യന്‍ നായകന്‍ സൗരവ് ഗാംഗുലി നടത്തിയ ആഘോഷം ആരാധകര്‍ ഒരിക്കലും മറക്കാനിടയില്ല. ഇത് വലിയ വിവാദവും ചര്‍ച്ചയുമായിരുന്നു. ഗാംഗുലിയുടെ ജഴ്‌സിയൂരിയുള്ള ആഘോഷത്തിന് പിന്നില്‍ ഒരു കാരണമുണ്ട്. ഇംഗ്ലണ്ടിന്റെ ആന്‍ഡ്രൂ ഫ്‌ളിന്റോഫിന്റെ പ്രകോപനമാണ് ഇതിന് കാരണം. ഇന്ത്യയെ മുംബൈയില്‍ ഇംഗ്ലണ്ട് തോല്‍പ്പിച്ചപ്പോള്‍ ഫ്‌ളിന്റോഫ് ജഴ്‌സിയൂരിയാണ് ആഘോഷപ്രകടനം നടത്തിയത്.

ഇന്ത്യയെ സംബന്ധിച്ച് വലിയ നാണക്കേടുണ്ടാക്കുന്ന തോല്‍വിയായിരുന്നു ഇത്. അതിന് ശേഷം നടന്ന നാറ്റ് വെസ്റ്റ് പരമ്പരയില്‍ ഇംഗ്ലണ്ടിന്റെ തട്ടകത്തില്‍ ജയിച്ച് പരമ്പര നേടിയപ്പോഴാണ് ഗാംഗുലി ഫ്‌ളിന്റോഫിന്റെ ജഴ്‌സിയൂരിയുള്ള ആഘോഷത്തിന് അതേ നാണയത്തില്‍ തിരിച്ചടി നല്‍കിയത്. ഫ്‌ളിന്റോഫിന്റെ പ്രകോപനത്തിന് ദാദയുടെ ഗംഭീര മറുപടി തന്നെയായിരുന്നു ഇത്.

യുവരാജിന്റെ ആറ് സിക്‌സ് മറുപടി

2007ലെ ടി20 ലോകകപ്പിലെ ഇന്ത്യ-ഇംഗ്ലണ്ട് മത്സരം ആരാധകര്‍ ഒരിക്കലും മറക്കില്ല. ഇംഗ്ലണ്ടിന്റെ സ്റ്റുവര്‍ട്ട് ബ്രോഡിന്റെ ഒരോവറിലെ ആറ് പന്തും യുവരാജ് സിങ് സിക്‌സര്‍ പായിച്ചത് ഇന്ത്യന്‍ ക്രിക്കറ്റിന്റെ എക്കാലത്തെയും മികച്ച സംഭവങ്ങളിലൊന്നാണ്. മത്സരത്തില്‍ ആന്‍ഡ്രൂ ഫ്‌ളിന്റോഫുമായി യുവരാജ് ഉടക്കിയിരുന്നു. ഇതില്‍ പ്രകോപിതനായാണ് യുവരാജ് ബ്രോഡിനെ ആറ് തവണ അതിര്‍ത്തി കടത്തിയത്. മത്സരശേഷം ഫ്‌ളിന്റോഫിന് കൈ നല്‍കി യുവരാജ് പ്രശ്‌നം പരിഹരിച്ചെങ്കിലും ഇംഗ്ലണ്ട് ഓള്‍റൗണ്ടറുടെ പ്രകോപനത്തിന് ചുട്ട മറുപടി തന്നെ നല്‍കാന്‍ യുവരാജിന് സാധിച്ചു.

ബംഗ്ലാദേശിന് ധോണിയുടെ ചെക്ക്

2016ലെ ടി20 ലോകകപ്പിലെ ബംഗ്ലാദേശ്-ഇന്ത്യ മത്സരം. വിജയലക്ഷ്യം പിന്തുടര്‍ന്നിറങ്ങിയ ബംഗ്ലാദേശിന് കൃത്യമായ മെല്‍കൈ ഇന്ത്യക്കെതിരേയുണ്ടായിരുന്നു. ബംഗ്ലാദേശ് വിജയം ഉറപ്പിച്ചതുപോലെയാണ് കളത്തില്‍ പെരുമാറിയത്. അവസാന രണ്ട് പന്തില്‍ ബംഗ്ലാദേശിന് ജയിക്കാന്‍ രണ്ട് റണ്‍സായിരുന്നു വേണ്ടിയിരുന്നത്. എന്നാല്‍ അവസാന പന്തില്‍ ധോണി ഒരു ഗൗസ് മാത്രമണിഞ്ഞ് കീപ്പ് ചെയ്യുകയും റണ്ണൗട്ടാക്കി ഒരു റണ്‍സിന്റെ ജയം നേടിയെടുക്കുകയും ചെയ്തു. മത്സരത്തിന് മുമ്പ് ഇന്ത്യന്‍ നായകന്‍ എംഎസ് ധോണിയെ സാമൂഹ്യ മാധ്യമങ്ങളിലൂടെ ബംഗ്ലാദേശ് ആരാധകര്‍ പരിഹസിച്ചിരുന്നു. ഇതിന്റെ മധുര പ്രതികാരമാണ് ധോണി കളത്തില്‍ തീര്‍ത്തത്.

വെങ്കടേഷ് പ്രസാദ്-അമീര്‍ സൊഹൈല്‍ പോരാട്ടം

ഇന്ത്യ-പാക് പോരാട്ടത്തിന് പ്രത്യേകം വീറും വാശിയും ഉണ്ടാകുന്നത് സ്വാഭാവികമാണ്. രാജ്യങ്ങള്‍ തമ്മിലുള്ള പ്രശ്‌നങ്ങള്‍ മത്സരത്തിലേക്കും എത്തുന്നതോടെ രാജ്യത്തിന്റെ അഭിമാന പ്രശ്‌നമായി മത്സരം മാറും. ഒരു തവണ ഇന്ത്യന്‍ പേസര്‍ വെങ്കടേഷ് പ്രസാദും പാകിസ്താന്റെ അമീര്‍ സൊഹൈലും കളത്തിലേറ്റുമുട്ടിയത് ആരാധകര്‍ക്ക് മറക്കാനാവാത്ത സംഭവമാണ്. വെങ്കടേഷിനെ ബൗണ്ടറി പായിച്ച് അമീര്‍ സൊഹൈല്‍ പ്രകോപിച്ചു. ബൗണ്ടറി ലൈനിലേക്ക് ബാറ്റുചൂണ്ടിക്കാട്ടിയാണ് സൊഹൈല്‍ പ്രകോപിപ്പിച്ചത്. എന്നാല്‍ തൊട്ടടുത്ത പന്തില്‍ സൊഹൈലിനെ ക്ലീന്‍ ബൗള്‍ഡാക്കിയാണ് പ്രസാദ് മറുപടി നല്‍കിയത്. സൊഹൈലിന്റെ പ്രകോപനത്തിന് പ്രസാദിന്റെ ഗംഭീര മറുപടി തന്നെയായിരുന്നു ഇത്.

വിരാട് കോലി-മിച്ചല്‍ ജോണ്‍സണ്‍

ഇന്ത്യയുടെ വീരാട് കോലി ആക്രണമോത്സകത കൂടുതലുള്ള താരമാണ്. ഒരു തരത്തിലുള്ള വിട്ടുവീഴ്ചക്കും കോലി തയ്യാറല്ല. 2014ലെ ബോര്‍ഡര്‍ ഗവാസ്‌കര്‍ ട്രോഫിയില്‍ കോലിയും മിച്ചല്‍ ജോണ്‍സണും ഏറ്റുമുട്ടിയത് ആവേശകരമായ കാഴ്ചയായിരുന്നു. മികച്ച രീതിയില്‍ ബാറ്റ് ചെയ്തിരുന്ന കോലിക്കെതിരേ അനാവശ്യ ത്രോ ചെയ്ത് മിച്ചല്‍ ജോണ്‍സണ്‍ പ്രകോപിപ്പിച്ചു. ഇത് കോലിയെ കട്ടകലിപ്പിലേക്കെത്തിച്ചു. ജോണ്‍സണെ ബൗണ്ടറി പായിച്ചാണ് കോലി ഇതിന് മറുപടി നല്‍കിയത്. ഈ പോരാട്ടം ഇന്ത്യന്‍ ആരാധകര്‍ എന്നും ഓര്‍ത്തിരിക്കുന്നതാണ്.