കോലി മികച്ച ക്യാപ്റ്റനല്ല!! എങ്ങനെ ധോണിയെപ്പോലെ കേമനാവാം? വഴി ഉപദേശിച്ച് കൈഫ്

ടീം സെലക്ഷനില്‍ കോലി കൂടി ശ്രദ്ധിക്കേണ്ടിയിരിക്കുന്നുവെന്ന് കൈഫ് ആവശ്യപ്പെട്ടു. ടീമില്‍ തുടര്‍ച്ചയായി മാറ്റങ്ങള്‍ വരുത്തിക്കൊണ്ടിരിക്കുന്നത് കോലി അവസാനിപ്പിക്കണം. ഏതെങ്കിലുമൊരു താരം കുറച്ചു മല്‍സരങ്ങളില്‍ ഫോമൗട്ട് ആയാല്‍ ഉടന്‍ അയാളെ പുറത്താക്കരുത്. മറിച്ച് പിന്തുണയ്ക്കുകയാണ് കോലി ചെയ്യേണ്ടത്. എങ്കില്‍ മാത്രമേ മികച്ചൊരു ടീമിനെ വാര്‍ത്തെടുക്കാന്‍ കോലിക്കു സാധിക്കുകയുള്ളൂവെന്നും കൈഫ് വിശദമാക്കി.

ടീമിലെ ഏറ്റവും നിര്‍ണായക റോളുകളിലൊന്നായ വിക്കറ്റ് കീപ്പറുടെ സ്ഥാനത്തു പോലും കോലി പരീക്ഷണം തുടരുകയാണ്. പലരെയും ഈ റോളില്‍ അദ്ദേഹം മാറി മാറി പരീക്ഷിക്കുന്നു. ഇന്ത്യക്കു വേണ്ടത് സ്‌പെഷ്യലിസ്റ്റ് വിക്കറ്റ് കീപ്പറെയാണ്, പാര്‍ട് ടൈം വിക്കറ്റ് കീപ്പറെയല്ല. കെഎല്‍ രാഹുലിനെ മുഖ്യ വിക്കറ്റ് കീപ്പറാക്കരുത്. ബാക്കപ്പായി മാത്രമേ അദ്ദേഹത്തെ പരീക്ഷിക്കാവൂയെന്നും കൈഫ് നിര്‍ദേശിച്ചു.
ഇന്ത്യയുടെ അവസാനത്തെ രണ്ടു നിശ്ചിത ഓവര്‍ പരമ്പരകളിലും വിക്കറ്റ് കാത്തത് രാഹുലായിരുന്നു.

എംഎസ് ധോണിയുടെ പിന്‍ഗാമിമായി കണ്ടു വച്ചിരിക്കുന്നത് റിഷഭ് പന്തിനെയാണെങ്കില്‍ അദ്ദേഹത്തെ കോലി പിന്തുണയ്ക്കണം. ഇടവേളകളില്‍ സഹതാരങ്ങള്‍ക്കു വെള്ളമെത്തിക്കുന്ന വെറുമൊരു വാട്ടര്‍ ബോയ് ആയി പന്തിനെ ഒതുക്കുന്നത് ശരിയല്ല. കോലിയില്‍ നിന്നും നിരന്തരം പിന്തുണ ലഭിച്ചാല്‍ മാത്രമേ പന്തിന് തന്റെ യഥാര്‍ഥ മികവ് പുറത്തു കൊണ്ടു വരാന്‍ കഴിയുകയുള്ളൂ.
താന്‍ ചൂണ്ടിക്കാട്ടി ഈ കാര്യങ്ങളില്‍ കൂടുതല്‍ ശ്രദ്ധിക്കുകയാണെങ്കില്‍ വിരമിക്കുമ്പോഴേക്കും ഇന്ത്യ കണ്ട ഏറ്റവും മികച്ച ക്യാറ്റനായി കോലി മാറുമെന്നും കൈഫ് വ്യക്തമാക്കി.