IPL: മുംബൈ എങ്ങനെ നാലു കപ്പടിച്ചു? പ്രധാന കാരണങ്ങള്‍ രണ്ടെണ്ണം- ചൂണ്ടിക്കാട്ടി ഗംഭീര്‍

മുംബൈയുടെ നേട്ടങ്ങള്‍ക്കെല്ലാം പിറകില്‍ പ്രധാനമായും രണ്ടു കാരണങ്ങളാണെന്നാണ് ഗംഭീര്‍ ചൂണ്ടിക്കാണിക്കുന്നത്. ഒന്ന് മുംബൈയുടെ സ്‌കൗട്ടിങ് സംവിധാനം ആണെങ്കില്‍ മറ്റൊന്ന് അവരുടെ ബോള്‍ഡായ തീരുമാനങ്ങളെടുക്കുന്നതിലുള്ള മികവാണ്. ഈ രണ്ടു കാര്യങ്ങളിലും മുംബൈ പുലര്‍ത്തുന്ന മികവിനെ ഗംഭീര്‍ അഭിനന്ദിച്ചു.
2013ല്‍ റിക്കി പോണ്ടിങിനു പകരം രോഹിത് നായകസ്ഥാനത്തേക്കു വന്ന ശേഷമാണ് മുംബൈ ആദ്യമായി ഐപിഎല്‍ കിരീടം കൈക്കലാക്കിയത്. അന്നു എംഎസ് ധോണിയുടെ ചെന്നൈ സൂപ്പര്‍ കിങ്‌സിനെ വീഴ്ത്തിയായിരുന്നു മുംബൈയുടെ കിരീടധാരണം.

രോഹിത് നായകസ്ഥാനത്തേക്കു വന്നതോടെ മുംബൈയുടെ സമയം തെളിഞ്ഞുവെന്നാണ് പിന്നീടുള്ള സീസണുകളിലെ പ്രകടനം അടിവരയിടുന്നത്. ഹിറ്റ്മാന് കീഴില്‍ മറ്റൊരു മുംബൈയായി മാറിയ ടീം മൂന്നു കിരീടങ്ങള്‍ കൂടി കൈക്കലാക്കുകയും ചെയ്തു. ഇതോടെ ഐപിഎല്ലിലെ തന്നെ ഏറ്റവുമധികം കിരീടമുയര്‍ത്തിയ ക്യാപ്റ്റനായി രോഹിത് മാറി.
വൈകാരികമായി തീരുമാനങ്ങളെടുക്കുന്നവരല്ല മുംബൈ. മറിച്ച് സ്‌പോര്‍ട്‌സില്‍ ഏറ്റവും നിര്‍ണായകമെന്നു ചൂണ്ടിക്കാണിക്കുന്ന പ്രായോഗികമായ തീരുമാനങ്ങളാണ് മുംബൈ എടുക്കാറുള്ളത്. ശക്തമായ തീരുമാനങ്ങള്‍ കൈക്കൊള്ളുമ്പോള്‍ അവിടെ വികാരങ്ങള്‍ക്കു ഒരു സ്ഥാനവുമില്ലെന്നും ഗംഭീര്‍ വിശദമാക്കി.

ജസ്പ്രീത് ബുംറ, പാണ്ഡ്യ ബ്രദേഴ്‌സ് (ക്രുനാല്‍ പാണ്ഡ്യ, ഹാര്‍ദിക് പാണ്ഡ്യ) തുടങ്ങിയ മിന്നും താരങ്ങളെ കണ്ടെത്തിയത് മുംബൈയുടെ സ്‌കൗട്ടിങ് സംവിധാനത്തിന്റെ മികവ് തന്നെയാണെന്നു ഗംഭീര്‍ ചൂണ്ടിക്കാട്ടി. ഗുജറാത്തില്‍ നടന്ന വെസ്റ്റ് സോണ്‍ ടി20 ലീഗിനിടെ മുംബൈയുടെ മുന്‍ കോച്ച് ജോണ്‍ റൈറ്റാണ് ബുംറയെ കണ്ടെത്തുന്നത്. ബുംറയുടെ ബൗളിങ് വേഗത്തിലും യോര്‍ക്കറുകള്‍ എറിയാനുള്ള മിടുക്കിലും ആകര്‍ഷണീയനായ റൈറ്റ് മുംബൈ ടീമില്‍ പേസറെ ഉള്‍പ്പെടുത്തുകയായിരുന്നു.
മികച്ച പല താരങ്ങളെയും കണ്ടെത്തിയെങ്കിലും മുംബൈയുടെ സ്‌കൗട്ടിങ് സംവിധാനത്തിനു ഇതിന്റെയൊന്നും ക്രെഡിറ്റ് ലഭിച്ചിട്ടില്ലെന്നു ഗംഭീര്‍ ചൂണ്ടിക്കാട്ടി. റിക്കി പോണ്ടിങിനെ നായകസ്ഥാനത്തു നിന്നു മാറ്റി രോഹിത്തിന് ക്യാപ്റ്റന്‍ സ്ഥാനം ഏല്‍പ്പിക്കുകയെന്നതത് വളരെ കടുപ്പമേറിയ തീരുമാനമാണ്. പക്ഷെ മുംബൈ അങ്ങനെയൊരു തീരുമാനമെടുക്കാന്‍ ധൈര്യം കാണിച്ചു. അറിയപ്പെടാതെ നിന്ന ബുംറ, ഹാര്‍ദിക്, ക്രുനാല്‍ എന്നിവരെ കണ്ടെത്തി ഉയര്‍ത്തിക്കൊണ്ടു വരികയെന്നത് എളുപ്പമുള്ള കാര്യമല്ല. മുംബൈയുടെ സ്‌കൗട്ടിങ് സംവിധാനത്തെയാണ് ഇതിനു പ്രശംസിക്കേണ്ടത്. പക്ഷെ അവര്‍ക്കു വേണ്ട അംഗീകാരം ലഭിച്ചിട്ടില്ല. മുംബൈ കൈവരിച്ച നേട്ടങ്ങള്‍ നോക്കൂ, അവരുടേ ടീമിനെ നോക്കൂ, ഐപിഎല്‍ കണ്ടതില്‍ വച്ച് ഏറ്റവും കരുത്തുറ്റ ടീം മുംബൈയുടേതാണെന്നും ഗംഭീര്‍ വിശദമാക്കി.