ഇന്ത്യ vs ദക്ഷിണാഫ്രിക്ക: ധോണിക്കായുള്ള കാത്തിരിപ്പ് തീരുന്നു... റാഞ്ചിയില്‍ കാണാം മുന്‍ നായകനെ!!

ധോണി റാഞ്ചിയിലെത്തും

മൂന്നാം ടെസ്റ്റിനായി ധോണി റാഞ്ചിയിലുണ്ടാവുമെന്നാണ് റിപ്പോര്‍ട്ടുകള്‍. കാഴ്ചക്കാരനായാണ് അദ്ദേഹം ടീമംഗങ്ങളുടെ പ്രകടനം കാണാന്‍ ജാര്‍ഖണ്ഡ് ക്രിക്കറ്റ് അസോസിയേഷന്‍ സ്‌റ്റേഡിയത്തിലെത്തുന്നത്.
ജാര്‍ഖണ്ഡ് സ്‌റ്റേറ്റ് ക്രിക്കറ്റ് അസോസിയേഷനാണ് മല്‍സരം ആസ്വദിക്കാന്‍ ധോണിയെ ക്ഷണിച്ചിരിക്കുന്നത്. ഇതിനു അദ്ദേഹം സമ്മതം മൂളിയിട്ടുണ്ടെന്നും ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.

ധോണിയുടെ സാന്നിധ്യം

ഇതിഹാസ നായകനായ ധോണിയുടെ സാന്നിധ്യം സ്റ്റേഡിയത്തിലേക്കു കൂടുതല്‍ കാണികളെ കൊണ്ടുവരുമെന്നാണ് ജാര്‍ഖണ്ഡ് ക്രിക്കറ്റ് അസോസിയേഷന്റെ കണക്കുകൂട്ടല്‍.
ശനിയാഴ്ച ധോണി തീര്‍ച്ചയായും റാഞ്ചിയിലെത്തും. മല്‍സരം കാണാന്‍ അദ്ദേഹം സ്റ്റേഡിയത്തിലുണ്ടാവുകയും ചെയ്യും. തനിക്കു ലഭിച്ച വിവരമനുസരിച്ച് ടെസ്റ്റിന്റെ ആദ്യദിവസമാണ് ധോണി ഇവിടെയത്തുകയെന്നും അദ്ദേഹത്തിന്റെ ബാല്യകാല കോച്ച് കേശവ് ബാനര്‍ജി അറിയിച്ചു.

ഉറപ്പിക്കാതെ അസോസിയേഷന്‍

ടെസ്റ്റിന്റെ ഒന്നാം ദിനമായിരിക്കും ധോണിയെത്തുകയെന്നു മുന്‍ കോച്ച് കേശവ് ബാനര്‍ജി ഉറപ്പിച്ച് പറയുമ്പോള്‍ ജാര്‍ഖണ്ഡ് സ്‌റ്റേറ്റ് ക്രിക്കറ്റ് അസോസിയേഷന് ഇക്കാര്യത്തില്‍ ഉറപ്പില്ല.
കളിയുടെ ഏതു ദിവസമാണ് ധോണി സ്‌റ്റേഡിയത്തിലെത്തുകയെന്നറിയില്ല. കാരണം ധോണിയെ പ്രവചിക്കുക ബുദ്ധിമുട്ടാണ്. റാഞ്ചിയിലുണ്ടെങ്കില്‍ തീര്‍ച്ചയായും അദ്ദേഹം സ്റ്റേഡിയത്തിലെത്തുമെന്നുറപ്പുണ്ടെന്ന് ക്രിക്കറ്റ് അസോസിയേഷന്‍ വക്താവ് പറഞ്ഞു.