മല്‍സരഫലം ധോണിയെ ബാധിക്കാറില്ലെന്നു തോന്നും! തന്നെക്കൊണ്ട് ഇതു കഴിയില്ല- പുകഴ്ത്തി ദ്രാവിഡ്

സഞ്ജയ് മഞ്ജരേക്കറുമായി ലൈവില്‍ വന്നപ്പോഴായിരുന്നു ധോണിയുട ഫിനിഷിങ് പാടവത്തെ ദ്രാവിഡ് പുകഴ്ത്തിയത്. വളരെ പ്രധാനപ്പെട്ട എന്തോ ഒരു കാര്യമാണ് ധോണി എല്ലായ്‌പ്പോഴും ചെയ്യുന്നതെന്ന് നിങ്ങളുടെ മനസ്സിലുണ്ടാവും. എന്നാല്‍ മല്‍സരഫലം തന്നെ ബാധിക്കുന്ന കാര്യമല്ല എന്ന തരത്തിലാണ് ധോണി കളിക്കാറുള്ളത്. ഇങ്ങനെയൊരു മാനസികാവസ്ഥയിലേക്കു എത്തിപ്പെടുക ഒരിക്കലും എളുപ്പമല്ല. ചിലപ്പോള്‍ സ്വാഭവികമായി തന്നെ ഇത് ഒരാളിലുണ്ടാവും, ഇല്ലെങ്കില്‍ അത് വളര്‍ത്തിയെടുക്കേണ്ടിവരുമെന്നും ദ്രാവിഡ് പറയുന്നു.

ധോണിയെപ്പോലെയൊരു മാനസികാവസ്ഥയില്‍ കളിക്കാന്‍ തനിക്കു സാധിക്കില്ല. മല്‍സരഫലം എന്താവുമെന്നത് തന്നെ വളരെ അഗാധമായി തന്നെ ബാധിക്കാറുണ്ട്. ധോണിക്കു സ്വാഭാവികമായി തന്നെ ലഭിച്ചതാണോ, അതോ സ്വയം വളര്‍ത്തിയെടുത്തതാണോ ഈ കഴിവെന്നറിയില്ല.
ഇതേക്കുറിച്ച് ധോണിയോട് ചോദിക്കുന്നത് നന്നായിരിക്കും. മികച്ച ഫിനിഷര്‍മാര്‍ ഇങ്ങനെയായിരിക്കും കളിയെ സമീപിക്കുക. അത്തമൊരു മാനസികാവസ്ഥയിലേക്ക് എത്തിച്ചേരാന്‍ അവര്‍ക്കു കഴിയുമെന്നും ദ്രാവിഡ് വിശദമാക്കി.

ധോണിയുടെ അന്താരാഷ്ട്ര കരിയറിനെക്കുറിച്ചുള്ള ചര്‍ച്ചകള്‍ ഇപ്പോള്‍ സജീവമാണ്. കഴിഞ്ഞ 11 മാസത്തിലേറെയായി ക്രിക്കറ്റില്‍ നിന്നു മാറി നില്‍ക്കുകയായിരുന്നു അദ്ദേഹം. കഴിഞ്ഞ വര്‍ഷം നടന്ന ലോകകപ്പിന്റെ സെമി ഫൈനലിലാണ് ധോണിയെ അവസാനമായി ക്രിക്കറ്റ് പിച്ചില്‍ കണ്ടത്.
ഐപിഎലിന്റെ പുതിയ സീസണില്‍ ചെന്നൈ സൂപ്പര്‍ കിങ്‌സിലൂടെ ക്രിക്കറ്റിലേക്കു മടങ്ങി വരാന്‍ തയ്യാറെടുക്കുകയായികരുന്നു ധോണി. ഇതിനു വേണ്ടി അവസാന വട്ട തയ്യാറെടുപ്പുകള്‍ നടത്തവെയാണ് കൊവിഡ്-19നെ തുടര്‍ന്ന് ടൂര്‍ണമെന്റ് അനിശ്ചിതമായി മാറ്റി വച്ചത്.