എവിടെയും ഉറച്ചു നില്ക്കാനായില്ല
ഐപിഎല്ലില് ഏതെങ്കിലുമൊരു ഫ്രാഞ്ചൈസിക്കൊപ്പം കൂടുതല് കാലം ഉറച്ചു നില്ക്കാന് തനിക്കു കഴിയാത്തതില് കുറ്റബോധമുണ്ടെന്ന് യുവി വെളിപ്പെടുത്തി. ഇന്ത്യന് ചേംബര് ഓഫ് കൊമേഴ്സിന്റെ ലൈഫ് ടൈം അച്ചീവ്മെന്റ് പുരസ്കാരം ഏറ്റുവാങ്ങിയ ശേഷമായിരുന്നു അദ്ദേഹം ഇക്കാര്യം പറഞ്ഞത്.
എന്താണ് അതിനുള്ള കാരണമെന്ന് അറിയില്ല. ഒരു ഫ്രാഞ്ചൈസിക്കു വേണ്ടിയും കൂടുതല് കാലം കളിക്കാനായില്ല. ഒന്നോ, രണ്ടോ ഫ്രാഞ്ചൈസികള്ക്കു വേണ്ടി കളിക്കണമെന്നായിരുന്നു ആഗ്രഹിച്ചിരുന്നതെന്നും യുവി പറയുന്നു.
കെകെആറിന് വേണ്ടി കളിക്കാനായില്ല
കൊല്ക്കത്ത നൈറ്റ് റൈഡേഴ്സിനുവേണ്ടി ഐപിഎഎല്ലില് കളിക്കുകയെന്നത് തന്റെ വലിയ സ്വപ്നമായിരുന്നുവെന്നും എന്നാല് നിര്ഭാഗ്യവശാല് അതിനു കഴിഞ്ഞില്ലെന്നും യുവി വ്യക്തമാക്കി.
കെകെആറിനൊപ്പം ചേരേണ്ടതായിരുന്നു.
പക്ഷെ ലേലത്തില് അവസാന നിമിഷം അവസരം നഷ്ടമായി. കരിയറിലെ ഏറ്റവും നിര്ഭാഗ്യകരമായ കാര്യമായിരുന്നു ഇത്. തുടര്ന്നാണ് റോയല് ചാലഞ്ചേഴ്സ് ബാംഗ്ലൂരിലെത്തിയത്. ഐപിഎല്ലില് താന് ഏറ്റവും മികച്ച പ്രകടനം നടത്തിയതും ആര്സിബിക്കു വേണ്ടിയായിരുന്നുവെന്നും യുവി പറഞ്ഞു.
രണ്ടു കിരീട വിജയങ്ങള്
ഐപിഎല്ലില് രണ്ടു ടീമുകള്ക്കൊപ്പം കിരീട വിജയത്തില് പങ്കാളിയാവാന് യുവിക്കു ഭാഗ്യമുണ്ടായിട്ടുണ്ട്. സണ്റൈസേഴ്സ് ഹൈദരാബാദിനൊപ്പവും കഴിഞ്ഞ സീസണില് മുംബൈ ഇന്ത്യന്സിനൊപ്പവുമാണ് അദ്ദേഹം കിരീടമുയര്ത്തിയത്.
ഐപിഎല്ലില് കിരീടം നേടാന് കഴിഞ്ഞത് വലിയ കാര്യം തന്നെയാണ്. വ്യത്യസ്ത ടീമുകള്ക്കു വേണ്ടി കളിക്കാന് കഴിഞ്ഞു. ഇവരില് മുംബൈക്കും ഹൈദരാബാദിനുമൊപ്പം ചാംപ്യന്മാരായത് മഹത്താ അനുഭവമാണെന്നും യുവി കൂട്ടിച്ചേര്ത്തു.