IPL 2022: ദിനേഷ് കാര്‍ത്തികിന് ശേഷം അരങ്ങേറ്റം, എന്നാല്‍ ഇതിനോടകം വിരമിച്ചു, അഞ്ച് പേരിതാ

ആര്‍ പി സിങ്

ഇന്ത്യന്‍ ആരാധകര്‍ക്ക് പെട്ടെന്ന് മറക്കാനാവാത്ത പേരാണ് ആര്‍പി സിങ്. ഇടം കൈയന്‍ പേസിന്റെ മനോഹാരിതകൊണ്ട് ആരാധക മനസില്‍ ചേക്കേറിയ ആര്‍പി സിങ് ഇന്ത്യ 2007ലെ ടി20 ലോകകപ്പ് കിരീടം നേടിയപ്പോള്‍ ഗംഭീര പ്രകടനത്തോടെ കൈയടി നേടിയിരുന്നു. 2005ല്‍ ഇന്ത്യന്‍ ടീമില്‍ അരങ്ങേറ്റം കുറിച്ച താരം മൂന്ന് ഫോര്‍മാറ്റിലും ഇന്ത്യക്കായി കളിച്ചു. 14 ടെസ്റ്റില്‍ നിന്നും 40 വിക്കറ്റും 58 ഏകദിനത്തില്‍ നിന്ന് 69 വിക്കറ്റും 10 ടി20യില്‍ നിന്ന് 15 വിക്കറ്റും വീഴ്ത്തിയിട്ടുണ്ട്. ഇന്ത്യക്കൊപ്പം വലിയ കരിയര്‍ പ്രതീക്ഷിച്ച താരത്തിന് തുടര്‍ പരിക്കുകളെത്തുടര്‍ന്നാണ് ഇതിനോടകം വിരമിക്കേണ്ടി വന്നത്. 82 ഐപിഎല്ലില്‍ നിന്ന് 90 വിക്കറ്റും ആര്‍പി സിങ് നേടിയിട്ടുണ്ട്.

പ്രവീണ്‍ കുമാര്‍

സ്വിങ് പേസുകൊണ്ട് വിസ്മയിപ്പിച്ച താരമാണ് പ്രവീണ്‍ കുമാര്‍. വലം കൈയനായാ താരം ഭേദപ്പെട്ട ബാറ്റിങ് പ്രകടനവും കാഴ്ചവെക്കാന്‍ കെല്‍പ്പുള്ളവനായിരുന്നു. ഇന്ത്യയിലും വിദേശത്തും ഒരുപോലെ തിളങ്ങിയിരുന്ന പ്രവീണ്‍ മൂന്ന് ഫോര്‍മാറ്റിലും ഇന്ത്യക്കായി കളിച്ചിട്ടുണ്ട്. 2007ലെ പാകിസ്താനെതിരായ ഏകദിനത്തിലൂടെയാണ് പ്രവീണിന്റെ അരങ്ങേറ്റം. ഇന്ത്യക്കായി ആറ് ടെസ്റ്റില്‍ നിന്ന് 27 വിക്കറ്റും 68 ഏകദിനത്തില്‍ നിന്ന് 77 വിക്കറ്റും 10 ടി20യില്‍ നിന്ന് എട്ട് വിക്കറ്റും പ്രവീണ്‍ വീഴ്ത്തിയിട്ടുണ്ട്. കളത്തിന് പുറത്തെ മോശം സ്വഭാവവും ഫിറ്റ്‌നസിലെ ശ്രദ്ധക്കുറവും പ്രവീണിന്റെ കരിയറിനെ ബാധിച്ചു. 119 ഐപിഎല്ലില്‍ 90 വിക്കറ്റും നേടിയിട്ടുള്ള പ്രവീണ്‍ കുമാര്‍ 2012ലാണ് അവസാനമായി ഇന്ത്യക്കായി കളിച്ചത്. 2017ന് ശേഷം ഐപിഎല്ലിലും കളിച്ചിട്ടില്ല.

അമ്പാട്ടി റായിഡു

ഇന്ത്യയുടെ വലം കൈയന്‍ ബാറ്റ്‌സ്മാനായ അമ്പാട്ടി റായിഡു 2013ലാണ് ഇന്ത്യന്‍ ടീമില്‍ അരങ്ങേറ്റം കുറിച്ചത്. 2010 മുതല്‍ ഐപിഎല്ലില്‍ സജീവമായിരുന്ന റായിഡുവിന് ഇന്ത്യന്‍ ടീമില്‍ വലിയ അവസരങ്ങള്‍ ലഭിച്ചില്ല. 55 ഏകദിനത്തില്‍ നിന്ന് 1694 റണ്‍സും ആറ് ടി20യില്‍ നിന്ന് 42 റണ്‍സുമാണ് നേടിയത്. 2019ലെ ഏകദിന ലോകകപ്പില്‍ നിന്ന് തഴഞ്ഞതിന്റെ നിരാശയിലാണ് റായിഡു വിരമിക്കല്‍ പ്രഖ്യാപിച്ചത്. എന്നാല്‍ ഇപ്പോഴും അദ്ദേഹം ഐപിഎല്ലില്‍ സിഎസ്‌കെയുടെ ഭാഗമാണ്.

പ്രഗ്യാന്‍ ഓജ

ഇടം കൈയന്‍ സ്പിന്നറായ പ്രഗ്യാന്‍ ഓജ ഇന്ത്യക്കായി മൂന്ന് ഫോര്‍മാറ്റിലും കളിച്ചിട്ടുള്ള താരമാണ്. 2008ല്‍ അരങ്ങേറ്റം കുറിച്ച ഓജ 2013ന് ശേഷം ഇന്ത്യക്കായി കളിച്ചില്ല. പരിക്കും ഫിറ്റ്‌നസ് പ്രശ്‌നങ്ങളുമാണ് ഓജക്ക് തിരിച്ചടിയായത്. 24 ടെസ്റ്റില്‍ നിന്ന് 113 വിക്കറ്റും 18 ഏകദിനത്തില്‍ നിന്ന് 21 വിക്കറ്റും 6 ടി20യില്‍ നിന്ന് 10 വിക്കറ്റും 92 ഐപിഎല്ലില്‍ നിന്ന് 89 വിക്കറ്റുമാണ് ഓജ നേടിയത്.

മുനാഫ് പട്ടേല്‍

ഇന്ത്യയുടെ വലം കൈയന്‍ പേസറായ മുനാഫ് പട്ടേല്‍ 2011ലെ ലോകകപ്പ് കിരീടം നേടിയ ഇന്ത്യയുടെ ഏകദിന ടീമിന്റെ ഭാഗമായിരുന്നു. 2006ല്‍ ഇന്ത്യക്കായി ഏകദിന അരങ്ങേറ്റം കുറിച്ച മുനാഫ് മൂന്ന് ഫോര്‍മാറ്റിലും ഇന്ത്യക്കായി കളിച്ചെങ്കിലും 2011ന് ശേഷം അന്താരാഷ്ട്ര മത്സരം കളിച്ചിട്ടില്ല. 13 ടെസ്റ്റില്‍ നിന്ന് 35 വിക്കറ്റും 70 ഏകദിനത്തില്‍ നിന്ന് 86 വിക്കറ്റും മൂന്ന് ടി20യില്‍ നിന്ന് നാല് വിക്കറ്റുമാണ് അദ്ദേഹം വീഴ്ത്തിയത്. 61 ഐപിഎല്ലില്‍ നിന്ന് 74 വിക്കറ്റും മുനാഫിന്റെ പേരിലുണ്ട്.