ഗാംഗുലി ബൗളര്‍, സച്ചിനും ദ്രാവിഡും ക്രീസില്‍!- ഒരിക്കല്‍ അതും സംഭവിച്ചു, ദാദയുടെ ടീം തോറ്റു

2006ലെ ടൂര്‍ണമെന്റ്

2006ല്‍ നടന്ന ചാലഞ്ചര്‍ ട്രോഫിയിലായിരുന്നു ക്രിക്കറ്റ് പ്രേമികള്‍ കാണാന്‍ ആഗ്രഹിച്ച അപൂര്‍വ്വ നിമിഷം പിറന്നത്. ഗാംഗുലി, സച്ചിന്‍, ദ്രാവിഡ് എന്നിവരെല്ലാം അവരുടെ കരിയറിലെ സുവര്‍ണ കാലഘട്ടത്തിലൂടെ കടപ്പുപോവുന്ന സമയമായിരുന്നു ഇത്. രണ്ടു ടീമുകള്‍ക്കു വേണ്ടിയായിരുന്നു അവര്‍ അന്നു അണിനിരന്നത്.
ദ്രാവിഡ് അന്നു ഇന്ത്യന്‍ ടീമിന്റെ ക്യാപ്റ്റന്‍ കൂടിയായിരുന്നു. ഇന്ത്യ ബ്ലൂ ടീമിനെയായിരുന്നു ചാലഞ്ചര്‍ ട്രോഫിയില്‍ അദ്ദേഹം നയിച്ചത്. സച്ചിന്‍ ഇതേ ടീമിലെ താരമായിരുന്നു. എംഎസ് ധോണിയും ടീമിന്റെ ഭാഗമായിരുന്നു.
ഗംഗുലിയാവട്ടെ ഇന്ത്യ ഗ്രീനിനു വേണ്ടിയാണ് ഇറങ്ങിയത്. അവരുടെ ക്യാപ്റ്റന്‍ പക്ഷെ ദാദയായിരുന്നില്ല, മുഹമ്മദ് കൈഫായിരുന്നു. ടൂര്‍ണമെന്റിലെ മൂന്നാമത്തെ ടീമായ ഇന്ത്യ റെഡ്‌സിന്റെ ക്യാപ്റ്റന്‍ വേണുഗോപാല്‍ റാവുവായിരുന്നു.

സച്ചിനും ദ്രാവിഡും ക്രീസില്‍

ടൂര്‍ണമെന്റിലെ രണ്ടാമത്തെ മല്‍സരത്തിലായിരുന്നു ബ്ലൂസും ഗ്രീനും ചെന്നൈയില്‍ വച്ചു നേര്‍ക്കുനേര്‍ വന്നത്. ഈ മല്‍സരത്തില്‍ ഗാംഗുലി ബൗള്‍ ചെയ്യുകയും ചെയ്തിരുന്നു. ആദ്യം ബാറ്റ് ചെയ്ത ദ്രാവിഡിന്റെ ബ്ലൂസ് 27 ഓവറില്‍ രണ്ടു വിക്കറ്റിന് 190 റണ്‍സെടുത്തു നില്‍ക്കെയാണ് നായകന്‍ കൈഫ് ഗാംഗുലിയെ പന്തേല്‍പ്പിച്ചത്. ടീമിനു ബ്രേക്ക്ത്രൂ നല്‍കാന്‍ അദ്ദേഹത്തിനാവുമെന്ന പ്രതീക്ഷയിലായിരുന്നു കൈഫ്.
സച്ചിന്‍ 114 റണ്‍സുമായും ദ്രാവിഡ് 15 റണ്‍സുമായുമാണ് അപ്പോള്‍ ക്രീസിലുണ്ടായിരുന്നത്. ഗാംഗുലിക്കു പക്ഷെ ഈ കൂട്ടുകെട്ടിനെ വേര്‍പിരിക്കാന്‍ സാധിച്ചില്ല. മല്‍സത്തില്‍ അഞ്ചോവര്‍ ബൗള്‍ ചെയ്ത ദാദ 23 റണ്‍സ് വിട്ടുകൊടുത്തു. പക്ഷെ വിക്കറ്റൊന്നും അദ്ദേഹത്തിനു നേടാനായില്ല.

ദ്രാവിഡിന്റെ ടീമിനു ജയം

മല്‍സരത്തില്‍ ഇന്ത്യ ഗ്രീനിനെ ദ്രാവിഡിന്റെ ഇന്ത്യ ബ്ലൂസ് തകര്‍ത്തുവിട്ടിരുന്നു. സച്ചിന്റെ (139) തകര്‍പ്പന്‍ സെഞ്ച്വറിയായിരുന്നു ടീമിന്റെ വിജയത്തിനു അടിത്തറയിട്ടത്. ഇര്‍ഫാന്‍ പഠാന്‍, ദ്രാവിഡ്, എംഎസ് ധോണി എന്നിവര്‍ ഫിഫ്റ്റിയും നേടിയിരുന്നു. നിശ്ചിത 50 ഓവറില്‍ ആറു വിക്കറ്റിന് 381 റണ്‍സെന്ന കൂറ്റന്‍ സ്‌കോര്‍ ബ്ലൂസ് പടുത്തുയര്‍ത്തി.
മറുപടിയില്‍ 26.4 ഓവറില്‍ വെറും 115 റണ്‍സിന്റെ കൈഫിന്റെ ഗ്രീന്‍ ടീം ഓള്‍ഔട്ടായി. ബാറ്റിങില്‍ കാര്യമായ ഇംപാക്ടുണ്ടാക്കാന്‍ സാധിക്കാതിരുന്ന ഗാംഗുലി ബാറ്റിങിലും പ്രതീക്ഷയ്‌ക്കൊത്തുയര്‍ന്നില്ല. 30 ബോളില്‍ 24 റണ്‍സെടുത്ത് അദ്ദേഹം പുറത്തായി.
ഇന്ത്യ ബ്ലൂസ്, ഇന്ത്യ റെഡ്‌സ് ടീമുകള്‍ തമ്മിലായിരുന്നു ഫൈനല്‍ കളിച്ചത്. മഴയെ തുടര്‍ന്നു കലാശക്കളി ഉപേക്ഷിക്കപ്പെട്ടതോടെ ഇരുടീമുകളും ട്രോഫി പങ്കുവയ്ക്കുകയായിരുന്നു.