ശ്രീശാന്തിനെ പുറത്താക്കിയത് താനോ? ആരോപണത്തിന് മറുപടിയുമായി കാര്‍ത്തിക്... പറഞ്ഞത് ഇതുമാത്രം

ബാലിശമായിപ്പോവും

ശ്രീശാന്തിന്റെ ആരോപണത്തിന് ചിരിച്ചുകൊണ്ടായിരുന്നു കാര്‍ത്തികിന്റെ മറുപടി. ഇന്ത്യന്‍ ടീമില്‍ അദ്ദേഹത്തിനു സ്ഥാനം നഷ്ടപ്പെടുത്തിയതിനു പിന്നില്‍ താനാണെന്ന ആരോപണത്തെക്കുറിച്ച് കേട്ടിരുന്നു. ഇതുപോലൊരു ആരോപണത്തിന് മറുപടി പറയുന്നത് ബാലിശമായിപ്പോവുമെന്നും കാര്‍ത്തിക് ചിരിച്ചുകൊണ്ട് പറഞ്ഞു. വിജയ് ഹസാരെ ട്രോഫിയില്‍ തമിഴ്‌നാടിനു വേണ്ടി മികച്ച പ്രകടനം നടത്തിയ അദ്ദേഹം ദേശീയ ടീമിലേക്കു തിരിച്ചുവരാന്‍ തയ്യാറെടുക്കുകയാണ്.

കാര്‍ത്തിക് സ്ഥിരാംഗമല്ല

കാര്‍ത്തികിനെതിരേ ശ്രീശാന്ത് ഉന്നയിച്ച ആരോപണത്തില്‍ കഴമ്പില്ലെന്നു തന്നെയായിരുന്നു നേരത്തേ പലരും ചൂണ്ടിക്കാട്ടിയിരുന്നത്. കാരണം ഇന്ത്യന്‍ ടീമിലെ സ്ഥിരാംഗം പോലുമല്ലാത്ത കാര്‍ത്തികിന് അക്കാലത്ത് ടീമിലെ സ്ഥിരസാന്നിധ്യമായ ശ്രീശാന്തിനെ എങ്ങനെ പുറത്താക്കാനാവുമെന്നതായിരുന്നു അവരുടെ ചോദ്യം. ദേശീയ ടീമിന് പലപ്പോഴും അകത്തും പുറത്തുമായി തുടരുന്ന താരമാണ് 34കാരനായ കാര്‍ത്തിക്.

വിലക്ക് 2020ല്‍ കഴിയും

അടുത്ത വര്‍ഷം 2020ലാണ് ശ്രീശാന്തിന് ബിസിസിഐ ഏര്‍പ്പെടുത്തിയ വിലക്ക് അവസാനിക്കുന്നത്. കരിയറിലെ നല്ല സമയം വിലക്ക് കാരണം നഷ്ടമായെങ്കിലും അദ്ദേഹം പ്രതീക്ഷ കൈവിട്ടിട്ടില്ല. ഇനിയുമൊരു അങ്കത്തിന് തനിക്കു ബാല്യമുണ്ടെന്നു തന്നെയാണ് ശ്രീശാന്ത് ഉറച്ചു വിശ്വസിക്കുന്നത്. വിലക്കിനു ശേഷം വിദേശ ടി20 ലീഗുകളിലും ഒരുകൈ നോക്കാന്‍ തന്നെയാണ് താരത്തിന്റെ നീക്കം. അതോടൊപ്പം ടെസ്റ്റില്‍ ഇന്ത്യക്കായി വീണ്ടും കളിച്ച് 100 വിക്കറ്റുകള്‍ തികയ്ക്കുകയെന്ന സ്വപ്‌നവും തനിക്കുണ്ടെന്നു ശ്രീശാന്ത് വെളിപ്പെടുത്തിയിരുന്നു.