ആകര്‍ഷിച്ചത് മൂന്നു യുവതാരങ്ങള്‍, അക്കൂട്ടത്തില്‍ റിഷഭില്ല!- കാരണം റെയ്‌ന പറയുന്നു

ദേവ്ദത്ത്, റുതുരാജ്, അക്ഷര്‍

റെയ്‌ന തിരഞ്ഞെടുത്ത മൂന്നു യുവതാരങ്ങളില്‍ രണ്ടു പേര്‍ ദേശീയ ടീമിനായി ഇനിയും അരങ്ങേറ്റം കുറിച്ചിട്ടില്ല. റോയല്‍ ചാലഞ്ചഴ്‌സ് ബാംഗ്ലൂരിന്റെ മറുനാടന്‍ മലയാളി ഓപ്പണര്‍ ദേവ്ദത്ത് പടിക്കല്‍, ചെന്നൈ സൂപ്പര്‍ കിങ്‌സ് ഓപ്പണര്‍ റുതുരാജ് ഗെയ്ക്ക്വാദ്, ഇന്ത്യക്കായി കളിച്ചുകഴിഞ്ഞ ഓള്‍റൗണ്ടര്‍ അക്ഷര്‍ പട്ടേല്‍ എന്നിവരാണ് റെയ്‌ന തിരഞ്ഞെടുത്ത മൂന്നു താരങ്ങള്‍.

റിഷഭ് എന്തുകൊണ്ടില്ല?

റിഷഭ് പന്തിനെ ഇക്കൂട്ടത്തിലേക്കു പരിഗണിക്കാതിരുന്നതിന് കാരണമെന്താണെന്നുള്ള ചോദ്യത്തിന് റെയ്‌നയുടെ മറുപടി ഇങ്ങനെയായിരുന്നു- റിഷഭ് ഇപ്പോള്‍ പുതിയ ആളല്ല, സീനിയര്‍ കാറ്റഗറിയിലേക്കു അദ്ദേഹം മാറിക്കഴിഞ്ഞു. റിഷഭ് ഒരുപാട് വളര്‍ന്നു. ഇപ്പോള്‍ സിക്‌സറുകള്‍ മാത്രമല്ല ബൗണ്ടറികളും അദ്ദേഹം നേടുന്നതായും റെയ്‌ന കൂട്ടിച്ചേര്‍ത്തു.

റുതുരാജ് ഗണ്‍ പ്ലെയര്‍

കര്‍ണാടകയില്‍ നിന്നുള്ള ദേവ്ദത്തിനെയാണ് ഞാന്‍ ആദ്യം തിരഞ്ഞെടുക്കുക. മഹാരാഷ്ട്രയുടെ റുതുരാജാണ് രണ്ടാമത്തെയാള്‍. അവന്‍ ഗണ്‍ പ്ലെയറാണ്. മൂന്നാമന്‍ അക്ഷറാണ്. കഠിനാധ്വാനമാണ് അക്ഷര്‍ നടത്തുന്നത്. രവീന്ദ്ര ജഡേജയുടെ അഭാവത്തില്‍ ഇന്ത്യക്കായി കളിച്ചപ്പോള്‍ അക്ഷര്‍ ഉജ്ജ്വല പ്രകടനം കാഴ്ചവയ്ക്കുകയും ചെയ്തിരുന്നു.
ഇവരെക്കൂടാതെ വേറെയും ചില കളിക്കാരുടെ പ്രകടനം ആകര്‍ഷിച്ചിട്ടുണ്ട്. ഉത്തര്‍പ്രദേശുകാരായ പ്രിയം ഗാര്‍ഗ്, കാണ്‍ ശര്‍മ, പഞ്ചാബിന്റെ അഭിഷേക് ശര്‍മ, കേരളത്തില്‍ നിന്നുള്ള സച്ചിന്‍ ബേബി എന്നിവരാണിത്. ഒരുപാട് കഠിനാധ്വാനം ചെയ്യുന്ന കളിക്കാരനാണ് സച്ചിന്‍ ബേബിയെന്നും റെയ്‌ന കൂട്ടിച്ചേര്‍ത്തു.

ധവാന്‍ ടെസ്റ്റ് ടീമില്‍ തിരിച്ചെത്തണം

ശ്രീലങ്കന്‍ പര്യടനത്തില്‍ ഇന്ത്യയുടെ നിശ്ചിത ഓവര്‍ ടീമുകളെ നയിക്കാനൊരുങ്ങുന്ന ഓപ്പണര്‍ ശിഖര്‍ ധവാനു റെയ്‌ന വിജയാശംസകള്‍ നേര്‍ന്നു. ധവാന്‍ ലങ്കയില്‍ മികച്ച പ്രകടനം നടത്തണമെന്നും ടെസ്റ്റ് ടീമില്‍ തിരിച്ചെത്തണമെന്നും ആഗ്രഹിക്കുന്നു. കാരണം വളരെ വലിയ താരമാണ് ധവാന്‍. ലങ്കയില്‍ മികച്ച പ്രകടനം നടത്താമെന്ന പ്രതീക്ഷയിലായിരിക്കും അദ്ദേഹമെന്നും റെയ്‌ന ചൂണ്ടിക്കാട്ടി.