കോലിയും സ്മിത്തും ഒന്നല്ല, രണ്ട്.... ചോക്കും ചീസും പോലെയെന്നു വാര്‍ണര്‍

മധ്യനിരയ്ക്കു കരുത്തു പകരുകയെന്ന ലക്ഷ്യത്തോടെയാണ് സ്മിത്ത് ഓരോ തവണയും ക്രീസിലെത്താറുള്ളതെന്നു വാര്‍ണര്‍ അഭിപ്രായപ്പെട്ടു. പലപ്പോഴും ടീമിനെ പ്രതിസന്ധി ഘട്ടത്തില്‍ നിന്നും രക്ഷപ്പെടുത്തുകയായിരിക്കും അദ്ദേഹത്തിന്റെ ചുമതല. വളരെ ആസ്വദിച്ചാണ് സ്മിത്ത് ബാറ്റ് ചെയ്യാറുള്ളത്. ഔട്ടാവുന്നതും അദ്ദേഹത്തിന് ഇഷ്ടമല്ലെന്നു വാര്‍ണര്‍ കൂട്ടിച്ചേര്‍ത്തു.

സ്മിത്തിനെപ്പോലെ തന്നെ തന്റെ വിക്കറ്റ് കൈവിടാന്‍ കോലിക്കും ഇഷ്ടമില്ല. കുറച്ചു നേരം ക്രീസില്‍ നില്‍ക്കാനായാല്‍ തനിക്കു അതിവേഗത്തില്‍ വലിയ സ്‌കോര്‍ നേടാനാവുമെന്ന് കോലിക്കറിയാം. എല്ലായ്‌പ്പോഴും എതിരാളികളേക്കാള്‍ ഒരുപടി മുന്നില്‍ നില്‍ക്കാനായിരിക്കും കോലിയുടെ ശ്രമം. കോലിയുടെ മികച്ച പ്രകടനം പിന്നാലെയെത്തുന്ന ബാറ്റ്‌സ്മാന്‍മാരെ സഹായിക്കുകയും ചെയ്യും. പ്രത്യേകിച്ചും ഇന്ത്യന്‍ ടീമില്‍ വെടിക്കെട്ട് ഇന്നിങ്‌സ് കളിക്കാന്‍ ശേഷിയുള്ള ഒരുപിടി ബാറ്റ്‌സ്മാന്‍മാരുണ്ടെന്നും വാര്‍ണര്‍ വിശദമാക്കി.

കോലിക്കും സ്മിത്തിനും വ്യത്യസ്തമായ ബാറ്റിങ് ശൈലിയാണുള്ളതെങ്കിലും ഇരുവരും ടീമിനെ സ്വാധീനിക്കുന്നത് ഒരുപോലെയാണെന്നു വാര്‍ണര്‍ അഭിപ്രായപ്പെട്ടു.
ടീമിന്റെ ഇന്നിങ്‌സിന് സ്ഥിരത നല്‍കുന്നതിനൊപ്പം ടീമിലെ മറ്റുള്ളവരുടെ ആത്മവശ്വാസമുര്‍ത്താനും കോലിക്കും സ്മിത്തിനും കഴിയും. ഇരുവരും നേരത്തേ പുറത്തായാല്‍ അത് അവരുടെ ടീമുകളെയും ബാധിക്കുമെന്നും വാര്‍ണര്‍ പറഞ്ഞു.

കോലിയും താനും തമ്മില്‍ ചില കാര്യങ്ങളില്‍ സമാനമതകളുണ്ടെന്നു വാര്‍ണര്‍ പറഞ്ഞു. ക്രിക്കറ്റിനോടുള്ള അതിയായ പാഷനാണ് തങ്ങള്‍ തമ്മിലുള്ള ഏറ്റവും വലിയ സാമ്യതയെന്നു അദ്ദേഹം വ്യക്തമാക്കി.
എല്ലായ്‌പ്പോഴും എന്തെങ്കിലുമൊക്കെ തെളിയിക്കുകയെന്ന ലക്ഷ്യത്തോടെയാണ് താനും കോലിയും ബാറ്റ് ചെയ്യാന്‍ ക്രീസിലെത്താറുള്ളത്. മറ്റുള്ളവരേക്കാള്‍ കൂടുതല്‍ റണ്‍സെടുക്കണമെന്നും, മറ്റാരേക്കാളും വേഗത്തില്‍ സിംഗിളെടുക്കണമെന്നും ആഗ്രഹിച്ചാണ് താന്‍ ഇറങ്ങാറുള്ളത്. കോലിയും ഇതേ പാഷനുള്ള താരമാണെന്നും വാര്‍ണര്‍ വിശദമാക്കി.