ഇന്ത്യന്‍ തോല്‍വിക്കു മുഖ്യ കാരണം ചൂണ്ടിക്കാട്ടി കപില്‍... പിന്നെങ്ങനെ ജയിക്കും? എവിടെ രാഹുല്‍?

ഇന്ത്യന്‍ ടീമില്‍ ഇടക്കിടെ വരുത്തിക്കൊണ്ടിരിക്കുന്ന മാറ്റങ്ങളാണ് പരാജയത്തിന്റെ പ്രധാനപ്പെട്ട കാരണങ്ങളിലൊന്നെന്നു കപില്‍ അഭിപ്രായപ്പെട്ടു. തങ്ങള്‍ കളിച്ചിരുന്ന കാലത്ത് ഇങ്ങനെയായിരുന്നില്ല. ഇപ്പോള്‍ എന്തൊക്കെയാണ് സംഭവിച്ചു കൊണ്ടിരിക്കുന്നത്? ഒരു ടീമിനെ വാര്‍ത്തെടുക്കുമ്പോള്‍ അതിലുള്‍പ്പെട്ട കളിക്കാര്‍ക്ക് ആത്മവിശ്വാസം നല്‍കുകയെന്നത് പ്രധാനപ്പെട്ട കാര്യമാണെന്നു കപില്‍ വിശദമാക്കി.

വിമര്‍ശനാത്മകമായി വെല്ലിങ്ടണ്‍ ടെസ്റ്റിനെ വിലയിരുത്തുമ്പോള്‍ എന്തുകൊണ്ടാണ് ടീമില്‍ നമ്മള്‍ ഇത്രയും മാറ്റങ്ങള്‍ വരുത്തുന്നതെന്നു മനസ്സിലാവുന്നില്ലെന്നു കപില്‍ വ്യക്തമാക്കി. ഓരോ മല്‍സരത്തിലും പുതിയൊരു ഇന്ത്യന്‍ ടീമിനെയാണ് കാണുന്നത്. ടീമിലെ ഒരു കളിക്കാരനുപോലും സ്ഥാനം സ്ഥിരമല്ല. ടീമില്‍ സ്ഥാനം സുരക്ഷിതമല്ലെന്നു തോന്നിയാല്‍ അതു കളിക്കാരുടെ പ്രകടനത്തെയും ബാധിക്കുമെന്നു കപില്‍ ചൂണ്ടിക്കാട്ടി.

ഇന്ത്യന്‍ ഡ്രസിങ് റൂമിലെ പ്രതിഭകളുടെ എണ്ണം കാണുമ്പോള്‍ ഏതൊരു എതിര്‍ ടീം ക്യാപ്റ്റനും ഭയപ്പെടുമെന്നു കപില്‍ പറഞ്ഞു. എന്തു ശക്തമായ ബാറ്റിങ് ലൈനപ്പാണ് ഇന്ത്യയുടേത്. ടെസ്റ്റില്‍ രണ്ട് ഇന്നിങ്‌സുകളിലും 200 റണ്‍സ് പോലും ടീമിന് തികയ്ക്കാന്‍ കഴിഞ്ഞില്ലെങ്കില്‍ വിദേശത്തു മാത്രമല്ല ഒരു പിച്ചിലും ഇന്ത്യക്കു ജയിക്കാന്‍ സാധിക്കില്ല. തന്ത്രങ്ങളൊരുക്കുന്നതിലും പ്ലാനിങിലും ഇന്ത്യ കൂടുതല്‍ ശ്രദ്ധിക്കേണ്ടതുണ്ടെന്നും കപില്‍ നിര്‍ദേശിച്ചു.

എന്തിനാണ് ടീം മാനേജ്‌മെന്റ് ഓരോ മല്‍സരത്തിലും കളിക്കാരെ മാറ്റിക്കൊണ്ടിരിക്കുന്നതെന്നു കപില്‍ ചോദിക്കുന്നു. ഓരോ മല്‍സരത്തിലും ഒരുപിടി മാറ്റങ്ങള്‍ വരുത്തുന്നത് നല്ല കാര്യമായി തോന്നുന്നില്ല. ഓരോ ഫോര്‍മാറ്റിലെയും സ്‌പെഷ്യലിസ്റ്റ് താരങ്ങളിലാണ് ടീം മാനേജ്‌മെന്റ് വിശ്വാസമര്‍പ്പിക്കുന്നത്.

കെഎല്‍ രാഹുല്‍ മികച്ച ഫോമിലാണ്. പക്ഷെ അദ്ദേഹം ടെസ്റ്റില്‍ പുറത്തിരിക്കുന്നു. ഒരു താരം ഫോമിലാണെങ്കില്‍ അയാള്‍ തീര്‍ച്ചയായും ടീമില്‍ സ്ഥാനമര്‍ഹിക്കുന്നുണ്ടെന്നാണ് താന്‍ വിശ്വസിക്കുന്നതെന്നും കപില്‍ പറഞ്ഞു.

ന്യൂസിലാന്‍ഡിനെതിരേ നേരത്തേ നടന്ന ടി20, ഏകദിന പരമ്പരകളില്‍ ഇന്ത്യന്‍ ബാറ്റിങ് നിരയില്‍ ഏറ്റവും മികച്ച പ്രകടനം പുറത്തെടുത്തത് രാഹുലായിരുന്നു. എന്നാല്‍ ടെസ്റ്റ് ടീമില്‍ നിന്നും തികച്ചും അപ്രതീക്ഷിതമായി താരം തഴയപ്പെടുകയായിരുന്നു.