Click it and Unblock the Notifications
ആദ്യ മൂന്നു ടെസ്റ്റുകള്‍ക്കില്ല
പരിക്കില്‍ നിന്നും പൂര്‍ണമായി മുക്തനാവാനാത്തതിനാല്‍ ഇംഗ്ലണ്ടിനെതിരായ ടെസ്റ്റ് പരമ്പരയിലെ ആദ്യ മൂന്നു മല്‍സരങ്ങളില്‍ ഭുവി ഇന്ത്യന്‍ നിരയില്‍ ഉണ്ടാവില്ല. അവസാന രണ്ടു ടെസ്റ്റുകളില്‍ അദ്ദേഹം ടീമില്‍ തിരിച്ചെത്തുമോയെന്ന കാര്യത്തില്‍ ഉറപ്പുമില്ല.
ഫിറ്റ്‌നസ് വീണ്ടെടുക്കുന്നതിന്റെ ഭാഗമായി ഭുവി ബെംഗളൂരുവിലെ ദേശീയ ക്രിക്കറ്റ് അക്കാദമിയില്‍ നാലാഴ്ചയുണ്ടാവും.
അവസാനത്തെ രണ്ടു ടെസ്റ്റുകളില്‍ അദ്ദേഹത്തെ ടീമിലുള്‍പ്പെടുത്തുന്ന കാര്യം ഇതിനു ശേഷം മാത്രമേ ബിസിസിഐ തീരുമാനിക്കുകയുള്ളൂ.
ബുംറ നേരത്തേ തന്നെ പുറത്ത്
ഇന്ത്യന്‍ പേസ് ബൗളിങിലെ മറ്റൊരു തുറുപ്പുചീട്ടായ ജസ്പ്രീത് ബുംറ നേരത്തെ തന്നെ പരിക്കിന്റെ പിടിയിലാണ്. ഇംഗ്ലണ്ടിനെതിരായ ഏകദിന പരമ്പരയില്‍ അദ്ദേഹം കളിച്ചിരുന്നില്ല. ടെസ്റ്റ് പരമ്പരയിലെ ആദ്യ ടെസ്റ്റില്‍ ബുംറയുണ്ടാവില്ലന്ന് കഴിഞ്ഞ ദിവസം ബിസിസിഐ വ്യക്തമാക്കുകയും ചെയ്തിരുന്നു.
ബുംറയ്ക്കു പിന്നാലെ ഭുവിയും പരിക്കിന്റെ പിടിയിലായതോടെ ഇന്ത്യന്‍ ബൗളിങില്‍ പുതിയ രണ്ടു പേരെ പരീക്ഷിക്കേണ്ടിവരും.
നേരത്തേയുള്ള പരിക്ക്
ഇപ്പോള്‍ നടക്കുന്ന ഇംഗ്ലണ്ട് പര്യടനത്തിനിടെയല്ല ഭുവിക്കു പരിക്കേറ്റത്. കഴിഞ്ഞ ഐപിഎല്‍ മുതല്‍ പരിക്ക് അദ്ദേഹത്തെ വേട്ടയാടുകയാണ്. ഐപിഎല്ലിന്റെ തുടക്കം മുതല്‍ തന്നെ പുറംഭാഗത്തെ പരിക്ക് ഭുവിയെ വലച്ചിരുന്നു. ഇതേ തുടര്‍ന്ന് ടൂര്‍ണമെന്റിലെ ചില മല്‍സരങ്ങളില്‍ സണ്‍റൈസേഴ്‌സ് ഹൈദരാബാദിനു വേണ്ടി അദ്ദേഹത്തിന് കളിക്കാനും സാധിച്ചിരുന്നില്ല.
ഇംഗ്ലണ്ടിനെതിരായ ഏകദിന പരമ്പരയിലെ ആദ്യ രണ്ടു കളികളിലും പുറത്തിരുന്ന ഭുവി നിര്‍ണായകമായ അവസാന മല്‍സരത്തില്‍ കളിച്ചിരുന്നു. എന്നാല്‍ ഏഴോവറില്‍ 49 റണ്‍സ് വഴങ്ങിയ അദ്ദേഹത്തിന് വിക്കറ്റൊന്നും നേടാനായില്ല. കൂടാതെ ഒരു ക്യാച്ച് ഭുവി നഷ്ടപ്പെടുത്തുകയും ചെയ്തു.
