T20 WC 2026: പിന്മാറിയത് വിഡ്ഢിത്തം! തുറന്നടിച്ച് മുന്‍ ബംഗ്ലാദേശ് താരം; ഇന്ത്യ വരണമെന്ന് ആഗ്രഹം

2026 ടി20 ലോകകപ്പിന്റെ തുടക്കത്തിൽ തന്നെ വലിയ വിവാദങ്ങൾക്ക് വഴിവെച്ച പ്രശ്നമായിരുന്നു ബം​ഗ്ലാദേശ് ടൂർണമെന്റ് ബഹിഷ്കരിച്ചത്. തങ്ങളുടെ ഗ്രൂപ്പ് ഘട്ട മത്സരങ്ങൾക്കായി ഇന്ത്യയിലേക്ക് വരാൻ ബംഗ്ലാദേശ് വിസമ്മതിച്ചതിനെത്തുടർന്ന് അവരെ ടൂർണമെന്റിൽ നിന്ന് ഒഴിവാക്കിയത് വലിയ വിവാദങ്ങൾക്ക് വഴിവെച്ചിരുന്നു. ഇന്ത്യയുമായുള്ള നിസ്സഹരണത്തെ തുടർന്ന് ബംഗ്ലാദേശ് വിട്ടുനിന്നത് വലിയ നഷ്ടമായെന്ന് തുറന്ന് പറയുകയാണ് ബംഗ്ലാദേശ് മുൻ താരം മുഹമ്മദ് റഫീഖ്. ഇന്ത്യയും ബംഗ്ലാദേശും തമ്മിലുള്ള രാഷ്ട്രീയ അസ്വാരസ്യങ്ങൾ കായികരംഗത്തെ ബാധിക്കരുതെന്നും ഇരുരാജ്യങ്ങളും സഹോദരങ്ങളെപ്പോലെയാണെന്നും റഫീഖ് മൈഖേലിന് (MyKhel) നൽകിയ പ്രത്യേക അഭിമുഖത്തിൽ വ്യക്തമാക്കി.

എന്താണ് സംഭവിച്ചത്?

2026 ജനുവരി ആദ്യവാരമാണ് വിവാദങ്ങൾക്ക് തുടക്കമാകുന്നത്. രാഷ്ട്രീയ സാഹചര്യങ്ങൾ കണക്കിലെടുത്ത് കൊൽക്കത്ത നൈറ്റ് റൈഡേഴ്സ് ടീമിൽ നിന്ന് ബംഗ്ലാദേശ് പേസർ മുസ്തഫിസുർ റഹ്മാനെ റിലീസ് ചെയ്യാൻ ബിസിസിഐ (BCCI) നിർദ്ദേശം നൽകി. ധാക്കയിലെ രാഷ്ട്രീയ മാറ്റങ്ങളെത്തുടർന്ന് ഇരുരാജ്യങ്ങളും തമ്മിലുള്ള ബന്ധത്തിൽ വിള്ളലേറ്റ സമയത്തായിരുന്നു ഇത്. കളിക്കാരുടെയും ഉദ്യോഗസ്ഥരുടെയും സുരക്ഷ ചൂണ്ടിക്കാട്ടി, ജനുവരി 4-ന് ബംഗ്ലാദേശ് ക്രിക്കറ്റ് ബോർഡ് (BCB) ഇന്ത്യയിൽ കളിക്കില്ലെന്ന് പ്രഖ്യാപിച്ചു. മത്സരങ്ങൾ ശ്രീലങ്കയിലേക്ക് മാറ്റണമെന്ന് അവർ ഐസിസിയോട് (ICC) ആവശ്യപ്പെട്ടു.

പിന്മാറ്റവും ഐസിസിയുടെ നടപടിയും

ബംഗ്ലാദേശിന്റെ ആവശ്യം ഐസിസി തള്ളി. സുരക്ഷാ പരിശോധനയിൽ ഭീഷണികളൊന്നുമില്ലെന്ന് വ്യക്തമായതായും അവസാന നിമിഷം മാറ്റങ്ങൾ വരുത്താൻ കഴിയില്ലെന്നും ഐസിസി അറിയിച്ചു. ഒടുവിൽ ജനുവരി 24-ന് ബംഗ്ലാദേശിനെ ടൂർണമെന്റിൽ നിന്ന് പുറത്താക്കുകയും അവർക്ക് പകരം സ്കോട്ട്ലൻഡിനെ ഉൾപ്പെടുത്തുകയും ചെയ്തു.

'ലോകകപ്പ് നഷ്ടമായതിൽ ബംഗ്ലാദേശ് ഖേദിക്കുന്നു'

മൈഖേലിന് (MyKhel) നൽകിയ പ്രത്യേക അഭിമുഖത്തിൽ മുഹമ്മദ് റഫീഖ് തന്റെ നിരാശ തുറന്നുപറഞ്ഞു. "ലോകകപ്പ് നഷ്ടമായതിൽ എല്ലാവർക്കും ഖേദമുണ്ട്. ആരാധകർക്കും ടീമിനും വലിയ പ്രതീക്ഷകളുണ്ടായിരുന്നു. ഭാവിയിൽ എന്തിനാണ് ഞങ്ങൾ പിന്മാറിയതെന്ന് ബോർഡ് ചിന്തിക്കേണ്ടി വരും. കളിക്കാർ തയ്യാറായിരുന്നുവെങ്കിലും മാനേജ്‌മെന്റ് അവരെ തടയുകയായിരുന്നു."

'ഇന്ത്യ ഫേവറിറ്റുകളായിരുന്നു, അവർ വിജയിച്ചു'

അസുഖബാധിതനായി വിശ്രമത്തിലായിരുന്നെങ്കിലും ലോകകപ്പ് മത്സരങ്ങൾ റഫീഖ് കൃത്യമായി നിരീക്ഷിച്ചിരുന്നു. "ഇന്ത്യ ലോകകപ്പ് ജയിക്കുമെന്ന് ഞാൻ കരുതിയിരുന്നു, അവർ അത് നേടുകയും ചെയ്തു. ഇന്ത്യയുടെ 8-9 ബാറ്റർമാരും മികച്ച പ്രകടനമാണ് നടത്തിയത്. തുടക്കത്തിൽ വിക്കറ്റുകൾ പോയാലും ആരെങ്കിലും ക്രീസിൽ ഉറച്ചുനിന്ന് വലിയ സ്കോർ നേടുന്നു. ഇന്ത്യൻ ടീമിന്റെ വിജയത്തിന് പിന്നിൽ ആ കൂട്ടായ പരിശ്രമമാണ്."

ഇരുരാജ്യങ്ങളും തമ്മിലുള്ള രാഷ്ട്രീയ പ്രശ്നങ്ങൾ കായികരംഗത്തെ ബാധിക്കരുതെന്നും റഫീഖ് ഓർമ്മിപ്പിച്ചു. "രാഷ്ട്രീയ പ്രശ്നങ്ങളെല്ലാം കഴിഞ്ഞു. നമ്മൾ എല്ലാവരും സഹോദരങ്ങളാണ്, നമുക്ക് ക്രിക്കറ്റിനോട് സ്നേഹമാണ്. രണ്ട് സഹോദരങ്ങൾക്ക് അധികകാലം അകന്നുനിൽക്കാൻ കഴിയില്ല. ഇന്ത്യ ഇവിടെ വന്ന് കളിക്കുമെന്ന് ഞാൻ പ്രത്യാശിക്കുന്നു. കായികം രാഷ്ട്രീയത്തിന് മുകളിലായിരിക്കണം," റഫീഖ് പറഞ്ഞു നിർത്തി.