covid-19: ബംഗ്ലാദേശ് ക്രിക്കറ്റ് ടീമിന് ഞെട്ടല്‍! കോച്ചിന് വൈറസ് ബാധ സ്ഥിരീകരിച്ചു

ധാക്ക: ബംഗ്ലാദേശ് ക്രിക്കറ്റ് ടീമിന്റെ ഡെവലപ്‌മെന്റ് കോച്ചിന് കൊവിഡ്-19 സ്ഥിരീകരിച്ചു. രാജ്യത്തെ മുന്‍ ഫസ്റ്റ് ക്ലാസ് ക്രിക്കറ്റ് താരം കൂടിയായ ആഷിഖുര്‍ റഹ്മാന്റെ പരിശോധനാ ഫലമാണ് പോസിറ്റീവായിരിക്കുന്നത്. ചൊവ്വാഴ്ചയാണ് തനിക്കു വൈറസ് ബാധ സ്ഥിരീകരിച്ചതെന്നു റഹ്മാന്‍ പറഞ്ഞു. നിലവില്‍ നഗരത്തിലെ ഒരു ആശുപത്രിയില്‍ ചികില്‍സയിലാണ് അദ്ദേഹം.

തുടക്കത്തില്‍ എന്താണ് അസുഖമെന്നു മനസ്സിലാക്കാന്‍ സാധിച്ചില്ല. തൊണ്ടയ്ക്കു വീക്കമാണെന്നാണ് ആദ്യം കരുതിയത്. തൊണ്ടയ്ക്കു കടുത്ത വേദനയും ആദ്യം അനുഭവപ്പെട്ടിരുന്നു. പതിയെ പനിയും വരാന്‍ തുടങ്ങി. പിന്നാലെ നെഞ്ചുവേദനയും വന്നതോടെ ഡോക്ടറെ സമീപിക്കുകയായിരുന്നു. തുടര്‍ന്നാണ് കൊവിഡ്-19 ടെസ്റ്റിനു വിധേയനായത്. കൊറോണ വൈറസ് തന്നെയാണെന്നു പരിശോധനയില്‍ തെളിയുകയായിരുന്നുവെന്നും റഹ്മാന്‍ വ്യക്തമാക്കി.

മുന്‍ പേസര്‍ കൂടിയായ റഹ്മാന്‍ ആറു വര്‍ഷം നീണ്ട കരിയറില്‍ 15 ഫസ്റ്റ് ക്ലാസ് മല്‍സരങ്ങളിലും 18 ലിസ്റ്റ് എ മല്‍സരങ്ങളിലും കളിച്ചിട്ടുണ്ട്. 2002ലെ അണ്ടര്‍ 19 ലോകകപ്പില്‍ കളിച്ച ബംഗ്ലാദേശ് ടീമിലെ അംഗം കൂടിയായിരുന്നു റഹ്മാന്‍. എന്നാല്‍ സീനിയര്‍ ടീമിനു വേണ്ടി ഒരിക്കല്‍പ്പോലും കളിക്കാന്‍ താരത്തിനായില്ല.

ഫസ്റ്റ് ക്ലാസ് ക്രിക്കറ്റില്‍ 36ഉം ലിസ്റ്റ് എ ക്രിക്കറ്റില്‍ 15ഉം വിക്കറ്റുകള്‍ റഹ്മാന്‍ നേടിയിട്ടുണ്ട്. ബംഗ്ലാദേശ് വനിതാ ക്രിക്കറ്റ് ടീമിന്റെ അസിസ്റ്റന്റ് കോച്ചായും 33 കാരനായ റഹ്മാന്‍ നേരത്തേ പ്രവര്‍ത്തിച്ചിട്ടുണ്ട്.