ദുബായ്: പാക്കിസ്ഥാന് ക്രിക്കറ്റ് കണ്ട എക്കാലത്തെയും മികച്ച താരങ്ങളിലൊരാളാണ് ഷാഹിദ് അഫ്രീദി. ബാറ്റിങ്ങിലും ബൗളിങ്ങളിലും ഒരു പോലെ തിളങ്ങുന്ന ഓള്റൗണ്ടര് ഏതു ടീമിനും ഭീഷണിയായിരുന്നു. അഫ്രീദി വിരമിച്ചശേഷം ആ നിരയിലേക്ക് മറ്റൊരു താരം ഉയര്ന്നു വന്നിട്ടില്ല. ഇപ്പോഴിതാ, പേരുകൊണ്ട് ഒരു യുവതാരം പാക് നിരയില് ശ്രദ്ധിക്കപ്പെടുകയാണ്.
പാക്കിസ്ഥാന്റെ മുന്നിര ബൗളര് മുഹമ്മദ് ആമിര് ഏഷ്യാ കപ്പില് പ്രതീക്ഷിച്ച പ്രകടനം പുറത്തെടുത്തിട്ടില്ല. അതുകൊണ്ടുതന്നെ അഫ്രീദിയെ ഇന്ത്യയ്ക്കെതിരെ ഞായറാഴ്ച നടക്കുന്ന മത്സരത്തില് പാക്കിസ്ഥാന് ഉള്പ്പെടുത്തിയേക്കും. ആദ്യ മത്സരത്തില് എട്ടുവിക്കറ്റിന്റെ നാണംകെട്ട തോല്വി ഏറ്റുവാങ്ങിയ പാക് നിര ഇന്ത്യയ്ക്കെതിരെ അഭിമാനപ്പോരാട്ടത്തിനായാണ് ഇറങ്ങുക.
ആറരഅടി ഉയരമുള്ള അഫ്രീദി ഇന്ത്യന് ബാറ്റിങ് നിരയെ കുഴപ്പത്തിലാക്കാന്പോന്ന ബൗളറാണ്. അണ്ടര് 19 ലോകകപ്പില് പാക്കിസ്ഥാന് വേണ്ടി 12 വിക്കറ്റെടുത്ത താരത്തെ രാഹുല് ദ്രാവിഡ് അഭിനന്ദിച്ചത് വാര്ത്തയായിരുന്നു. അടുത്ത ലോകകപ്പില് പാക്കിസ്ഥാന്റെ മുഖ്യ പന്തേറുകാരനാകാനുള്ള തയ്യാറെടുപ്പിലാണ് ഇപ്പോള് ഈ യുവതാരം. ഇന്ത്യയ്ക്കെതിരെ മികച്ച പ്രകടനം നടത്തിയാല് ടീമില് സ്ഥിരതനേടാന് കഴിയുമെന്നാണ് പ്രതീക്ഷ.