എന്തിന് ബാബറിന് ഇത്ര കൈയടി? ബാറ്റിങ് അത്ര പോരാ! പോരായ്മ ചൂണ്ടിക്കാട്ടി മുന്‍ പാക് സൂപ്പര്‍ താരം

സ്വന്തം യൂട്യൂബ് ചാനലിലെ വീഡിയോയിലാണ് ബാബറിന്റെ ബാറ്റിങ് ടെക്‌നിക്കിലെ പ്രധാനപ്പെട്ട പോരായ്മ സൊഹൈല്‍ തുറന്നു പറഞ്ഞത്. ബാറ്റ് ചെയ്യുമ്പോഴുള്ള ബാബറിന്റെ നില്‍പ്പ് അത്ര നല്ലതായി തോന്നിയിട്ടില്ല. ഷോട്ട് കളിക്കുമ്പോഴുള്ള മൂവ്‌മെന്റും മികച്ചതല്ല. ഒരുപക്ഷെ ബൗള്‍ഡാവുന്നതും എല്‍ബിഡബ്യുവാകുന്നതും ഒഴിവാക്കുന്നതിനു വേണ്ടിയായിരിക്കും ഇത്. ഇത് മെച്ചപ്പെടുത്തിയാല്‍ കുറേക്കൂടി ആധികാരികമായി ബൗളര്‍മാരെ നേരിടാന്‍ ബാബറിനു കഴിയുമെന്നു സൊഹൈല്‍ അഭിപ്രായപ്പെട്ടു.

നിലവില്‍ പാക് ടീമിന്റെ മുഖ്യ കോച്ചും മുഖ്യ സെലക്ടറുമായ മിസ്ബാഹുല്‍ ഹഖ് ബാബറിന്റെ ബാറ്റിങിലെ ഈ പോരായ്മ തിരിച്ചറിഞ്ഞിട്ടുണ്ടാവുമെന്നാണ് കരുതുന്നതെന്ന് സൊഹൈല്‍ വ്യക്തമാക്കി.
മിസ്ബാഹിനും ബാബറിന്റെ ബാറ്റിങ് ടെക്‌നിക്കിലെ ഈ പോരായ്മ മനസ്സിലായിട്ടുണ്ടാവും. ഇത് പരിഹരിക്കാന്‍ അദ്ദേഹം സഹായിക്കുമെന്നാണ് പ്രതീക്ഷിക്കുന്നത്. മഹാനായ ബാറ്റ്‌സ്മാനായി മാറുക ബാബറിന് അത്ര എളുപ്പമാവില്ല. കരിയറിലെ ഒരു ഘട്ടത്തില്‍ റണ്‍സ് നേടാന്‍ ബാബര്‍ ശരിക്കും ബുദ്ധിമുട്ട് നേരിടുകയും ചെയ്യുമെന്ന് സൊഹൈല്‍ കൂട്ടിച്ചേര്‍ത്തു.

ബാബര്‍ ഇപ്പോള്‍ നേടുന്ന റണ്‍സില്‍ 40 ശതമാനത്തിനു മുകളിലും ബൗണ്ടറികളില്‍ നിന്നാണെന്നു സൊഹൈല്‍ അഭിപ്രായപ്പെട്ടു. കരിയറില്‍ കുറച്ചുകൂടി കഴിഞ്ഞാല്‍ ഇപ്പോഴത്തേതു പോലെ ബാബറിന് ബൗണ്ടറികള്‍ നേടാന്‍ കഴിയില്ല. ഇതു മറികടക്കണമെങ്കില്‍ മറ്റു വഴികള്‍ കണ്ടെത്തണം. സിംഗിളും ഡബിളും കളിച്ച് റണ്‍സ് നേടാനാണ് ബാബര്‍ ഇനി പഠിക്കേണ്ടത്. എങ്കില്‍ മാത്രമേ ബാബറിന് മഹാനായ ബാറ്റ്‌സ്മാനെന്ന് പേരെടുക്കാന്‍ കഴിയൂവെന്നും സൊഹൈല്‍ വ്യക്തമാക്കി.
പാകിസ്താന്റെ മികച്ച ഓപ്പണര്‍മാരില്‍ ഒരാളായാണ് സൊഹൈല്‍ ചൂണ്ടിക്കാണിക്കപ്പെടുന്നത്. ടെസ്റ്റില്‍ 2823ഉം ഏകദിനത്തില്‍ 4780 റണ്‍സും അദ്ദേഹം നേടിയിട്ടുണ്ട്.