പ്രതിരോധ കോട്ട കെട്ടാൻ ഇവർ വരും!; 2026 ഫിഫ ലോകകപ്പ് ഭരിക്കാൻ ഒരുങ്ങുന്ന 5 ലോകോത്തര ഡിഫൻഡർമാർ ഇതാ!

വരാനിരിക്കുന്ന 2026 ഫിഫ ലോകകപ്പിൽ വമ്പൻ ടീമുകളുടെ മുന്നേറ്റനിരയിലെ സൂപ്പർ താരങ്ങളുടെ കളിമികവിലേക്ക് സാധാരണയായി ആരാധകരുടെ കണ്ണുകളെത്തുമ്പോൾ, കപ്പടിക്കാൻ ഒരു ടീമിന് ഏറ്റവും അത്യാവമുള്ള മറ്റൊരു ഡിപ്പാർട്ട്മെന്റിനെ നാം മറന്ന് പോകരുത്, പ്രതിരോധം. ലോകകപ്പ് ചരിത്രം പരിശോധിച്ചാൽ മനസ്സിലാകും, മികച്ച ആക്രമണ നിരയുള്ള ടീമുകളേക്കാൾ ടൂർണമെന്റുകൾ ജയിച്ചിട്ടുള്ളത് വിട്ടുകൊടുക്കാത്ത പ്രതിരോധക്കോട്ട കെട്ടിയ രാജ്യങ്ങളാണ്.

സമീപകാല സീസണുകളിൽ ക്ലബ്ബ് ഫുട്ബോളിൽ തങ്ങളുടെ മേധാവിത്വം തെളിയിച്ച, വടക്കേ അമേരിക്കയിൽ നടക്കാനിരിക്കുന്ന ഇരുപത്തിമൂന്നാമത് ലോകകപ്പിൽ കളം നിറയാൻ സാധ്യതയുള്ള 5 മുൻനിര ഡിഫൻഡർമാരെ താഴെ പരിചയപ്പെടാം:

5. വിർജിൽ വാൻ ഡൈക് (നെതർലൻഡ്സ്)

ഒരു ആധുനിക സെന്റർ ബാക്ക് എങ്ങനെയായിരിക്കണം എന്നതിന്റെ ഉത്തമ ഉദാഹരണമാണ് വിർജിൽ വാൻ ഡൈക്. ആകാശത്തുയർന്നു വരുന്ന പന്തുകളെ പ്രതിരോധിക്കാനുള്ള കഴിവും, ടീമിനെ നയിക്കാനുള്ള ലീഡർഷിപ്പ് ക്വാളിറ്റിയുമാണ് ഈ ലിങ്കൺ താരത്തിന്റെ കരുത്ത്. 2018 മുതൽ ലിവർപൂളിന്റെ പ്രതിരോധ ഭടനായി തിളങ്ങുന്ന ഈ 34-കാരന് തന്റെ പഴയ വേഗതയിൽ നേരിയ കുറവുണ്ടായിട്ടുണ്ടെങ്കിലും, അദ്ദേഹത്തിന്റെ പരിചയസമ്പത്ത് ഡച്ച് പടയ്ക്ക് വലിയ ഊർജ്ജമാകും. തുടർച്ചയായ രണ്ടാം ലോകകപ്പിലാണ് വാൻ ഡൈക് നെതർലൻഡ്സിനെ നയിക്കുന്നത്. ഖത്തർ ലോകകപ്പിൽ ക്വാർട്ടർ ഫൈനൽ വരെ ടീമിനെ എത്തിക്കാൻ ഇദ്ദേഹത്തിന് കഴിഞ്ഞിരുന്നു. നെതർലൻഡ്സിനായി 92 മത്സരങ്ങളിൽ നിന്ന് 12 ഗോളുകളും ഈ പ്രതിരോധ താരം നേടിയിട്ടുണ്ട്.

4. നുനോ മെൻഡസ് (പോർച്ചുഗൽ)

പാരീസ് സെന്റ് ഷെർമെയ്നൊപ്പം (PSG) രണ്ട് തവണ യുവേഫ ചാമ്പ്യൻസ് ലീഗ് കിരീടം ചൂടിയ നുനോ മെൻഡസ് ലോകത്തിലെ ഏറ്റവും മികച്ച ലെഫ്റ്റ് ബാക്കുകളിൽ ഒരാളാണ്. ലോകോത്തര വിങ്ങർമാരെ പൂട്ടുന്നതിനൊപ്പം തന്നെ എതിർ ബോക്സിലേക്ക് ഓടിക്കയറി ആക്രമണം അഴിച്ചുവിടാനും ഈ 23-കാരന് പ്രത്യേക മിടുക്കുണ്ട്. 2022 ലോകകപ്പിൽ പരിക്ക് കാരണം പാതിവഴിയിൽ പിന്മാറേണ്ടി വന്ന മെൻഡസ്, 2025-ൽ സ്പെയിനെതിരെ ഗോൾ നേടി പോർച്ചുഗലിനെ നേഷൻസ് ലീഗ് കിരീടത്തിലേക്ക് നയിക്കുന്നതിൽ പ്രധാന പങ്കുവഹിച്ചു. പിഎസ്ജിക്കൊപ്പം കിരീടങ്ങൾ വാരിക്കൂട്ടിയ ഫോമിലാണ് താരം ഇത്തവണ ലോകകപ്പിനെത്തുന്നത്.

3. വില്യം സാലിബ (ഫ്രാൻസ്)

കഴിഞ്ഞ നാല് സീസണുകളായി ആഴ്സണലിന്റെ പ്രതിരോധ നിരയിൽ ഗബ്രിയേൽ മഗാലീസിനൊപ്പം തകർപ്പൻ കൂട്ടുകെട്ടുണ്ടാക്കിയ താരമാണ് വില്യം സാലിബ. 'റോൾസ് റോയ്‌സ്' (Rolls Royce) എന്ന് വിളിപ്പേരുള്ള സാലിബയ്ക്ക് ഒരു മികച്ച ഡിഫൻഡർക്ക് വേണ്ട കരുത്തും ബുദ്ധിശക്തിയും പന്തുമായി മുന്നേറാനുള്ള കഴിവുമുണ്ട്. കഴിഞ്ഞ ലോകകപ്പിൽ ഫ്രാൻസ് ടീമിൽ കുറച്ചു സമയം മാത്രമാണ് കളിക്കാൻ അവസരം ലഭിച്ചതെങ്കിലും, നീണ്ട 22 വർഷങ്ങൾക്ക് ശേഷം ആഴ്സണലിന് പ്രീമിയർ ലീഗ് കിരീടം നേടിക്കൊടുക്കുന്നതിൽ നിർണായക പങ്കുവഹിച്ചതോടെ ഇത്തവണ ഫ്രഞ്ച് കോച്ച് ദിദിയർ ദെഷാംപ്സിന്റെ വിശ്വസ്തനായി സാലിബ ആദ്യ ഇലവനിൽ ഉണ്ടാകുമെന്നുറപ്പാണ്.

2. അഷ്റഫ് ഹക്കീമി (മൊറോക്കോ)

മൊറോക്കോയുടെ വിങ് ബാക്കായ അഷ്റഫ് ഹക്കീമി ക്ലബ്ബ് തലത്തിലും അന്താരാഷ്ട്ര തലത്തിലും ഒരുപോലെ തരംഗം സൃഷ്ടിച്ച കളിക്കാരനാണ്. 2022 ഖത്തർ ലോകകപ്പിൽ മൊറോക്കോയെ സെമി ഫൈനൽ വരെയെത്തിച്ച് ചരിത്രം കുറിച്ചതിൽ ഹക്കീമിയുടെ പങ്ക് വലുതായിരുന്നു. ഒരു ആഫ്രിക്കൻ രാജ്യം ലോകകപ്പിന്റെ സെമിയിലെത്തുന്നത് അദ്യമായിട്ടായിരുന്നു. തന്റെ കരിയറിന്റെ ഏറ്റവും മികച്ച ഫോമിൽ കളിക്കുന്ന ഈ പിഎസ്ജി താരം ഇത്തവണയും മൊറോക്കോയ്ക്കായി അത്ഭുതങ്ങൾ കാട്ടുമെന്നാണ് ആരാധകർ പ്രതീക്ഷിക്കുന്നത്. ഈ ലോകകപ്പിലും തിളങ്ങാനായാൽ തുടർച്ചയായ രണ്ടാം തവണയും 'ആഫ്രിക്കൻ പ്ലെയർ ഓഫ് ദി ഇയർ' പുരസ്കാരം ഹക്കീമിയെ തേടിയെത്തും.

1. ഗബ്രിയേൽ മഗാലീസ് (ബ്രസീൽ)

യുവേഫ ചാമ്പ്യൻസ് ലീഗ് ഫൈനലിൽ പിഎസ്ജിക്കെതിരെയുള്ള പെനാൽറ്റി ഷൂട്ടൗട്ടിൽ പിഴവ് സംഭവിച്ചെങ്കിലും, 2025/26 സീസണിൽ ലോകത്തിലെ ഏറ്റവും മികച്ച ഡിഫൻഡർമാരിൽ ഒരാളായിരുന്നു ആഴ്സണലിന്റെ ഈ ബ്രസീലിയൻ താരം. പ്രതിരോധത്തിലെ കരുത്തിനൊപ്പം കോർണർ കിക്കുകളിലും സെറ്റ് പീസുകളിലും ഹെഡ്ഡറുകളിലൂടെ ഗോൾ നേടാനുള്ള (Aerial Threat) കഴിവും ഗബ്രിയേലിനെ വേറിട്ടു നിർത്തുന്നു. 28-കാരനായ ഗബ്രിയേലും മാർക്വിഞ്ഞോസും ചേർന്നാകും ഇത്തവണ ബ്രസീലിന്റെ പ്രതിരോധം നിയന്ത്രിക്കുക. 24 വർഷത്തെ ഇടവേളയ്ക്ക് ശേഷം കാനറിപ്പടയ്ക്ക് ഒരു ലോകകിരീടം നേടിക്കൊടുക്കുക എന്ന വലിയ ലക്ഷ്യവുമായാണ് താരം ബൂട്ട് കെട്ടുന്നത്.