യു.എസ് ഓപണ്‍: സാനിയ പുറത്ത്

ന്യൂയോര്‍ക്ക്: യു.എസ് ഓപണ്‍ സിംഗിള്‍സില്‍ നിന്ന് ഇന്ത്യന്‍ ടെന്നിസ് വിസ്മയം സാനിയ മിര്‍സ പുറത്തായി. ഡബിള്‍സിലെ മുന്‍ പങ്കാളിയായ ഇസ്രായേല്‍ താരം ഷഹര്‍ പീറാണ് സാനിയയെ ആദ്യറൗണ്ടില്‍ തന്നെ കെട്ടുകെട്ടിച്ചത്. സ്‌കോര്‍: 6-7, 6-3, 6-1.

സാനിയയുടെ ദുര്‍ബലമായ സെര്‍വുകളാണ് പീറിന് അനുഗ്രഹമായത്. ഏഴുതവണ സെര്‍വ് വിട്ടുകൊടുത്ത സാനിയ ഒമ്പതോളം ഡബിള്‍ ഫാള്‍ട്ടുകളാണ് വരുത്തിയത്.

എന്നാല്‍ പുരുഷവിഭാഗം ഡബിള്‍സില്‍ ഇന്ത്യക്ക് സന്തോഷിക്കാന്‍ വകയുണ്ട്. ഇന്ത്യയുടെ ലിയാണ്ടര്‍ പേസ്- മഹേഷ് ഭൂപതി സഖ്യം രണ്ടാം റൗണ്ടില്‍ കടന്നു. ഉക്രെയ്ന്‍-സ്‌പെയിന്‍ കൂട്ടുകെട്ടായ അലക്‌സാണ്ടര്‍ ഡോള്‍ഗോപോലോവ്-ആല്‍ബെര്‍ട്ട് റാമോസ് ജോടികളെയാണ് തോല്‍പ്പിച്ചത്.

മറ്റൊരു ഡബിള്‍സ് മല്‍സരത്തില്‍ രോഹന്‍ ബൊപ്പണ്ണയും പാകിസ്താന്‍ പാര്‍ട്ണര്‍ ഐസാം ഉള്‍ഹഖും അണ്‍സീഡഡ് താരങ്ങളായ റോബി ഗിനെപ്രി, റയന്‍ വില്യംസ് സഖ്യത്തിനെതിരേ വിജയം കണ്ടു. അടുത്ത റൗണ്ടില്‍ ട്രാവിസ് പാരറ്റ്, ബോബി റെയ്‌നോള്‍ഡ്‌സ് സഖ്യത്തെയാണ് ഇന്തോ-പാക് കൂട്ടുകെട്ട് നേരിടുക.