റോമില്‍ ജൊകോവിക്കും നദാലും

റോം: ലോക രണ്ടാം നമ്പര്‍ താരം റോജര്‍ ഫെഡററെ തോല്‍പ്പിച്ച് നമ്പര്‍ വണ്‍ താരം നൊവാക് ജൊകോവിക് റോം മാസ്‌റ്റേഴ്‌സ് ടെന്നിസ് ടൂര്‍ണമെന്റിന്റെ ഫൈനലില്‍ കടന്നു. സ്‌പെയിന്‍ താരം റഫേല്‍നദാലാണ് കലാശപ്പോരാട്ടത്തില്‍ ജൊകോവിന്റെ എതിരാളി.

ഇഞ്ചോടിഞ്ച് പ്രതിരോധിച്ചതിനുശേഷമാണ് സ്വിസ് താരം നിലവിലുള്ള ചാംപ്യനു മുന്നില്‍ മുട്ടുമടക്കിയത്. സ്‌കോര്‍: 6-2, 7-6. നാട്ടുകാരനായ ഡേവിഡ് ഫെററെ 7-6, 7-0 എന്ന സ്‌കോറില്‍ മറികടന്നാണ് അഞ്ചു തവണ ചാംപ്യനായിട്ടുള്ള നദാല്‍ അവസാന രണ്ടില്‍ ഇടംപിടിച്ചത്.

ക്ലേ കോര്‍ട്ടില്‍ എന്റെ ഏറ്റവും മികച്ച പ്രകടനങ്ങളിലൊന്നായിരുന്നു അത്-മത്സരശേഷം ജൊകോവിക് പറഞ്ഞു. ഫെഡററില്‍ നിന്നും കടുത്ത വെല്ലുവിളി പ്രതീക്ഷിച്ചിരുന്നു. അതുകൊണ്ടു തന്നെ കരുതലോടെയാണ് കളിക്കാനിറങ്ങിയത്. മാഡ്രിഡ് ഓപണിലെ മത്സരത്തിനുശേഷം ഏറെ ക്ഷീണിതനായിരുന്നു. കൂടാതെ ജൊകോവിക് തകര്‍പ്പന്‍ പ്രകടനമാണ് കാഴ്ചവെച്ചത്-റോജര്‍ ഫെഡറര്‍ പറഞ്ഞു.

മത്സരത്തില്‍ തുടക്കത്തില്‍ ഡേവിഡ് മികച്ച പ്രതിരോധമാണ് തീര്‍ത്തത്. എന്നെ ഏറെ സന്തോഷിപ്പിച്ച കാര്യമായിരുന്നു അത്. ചിലപ്പോഴെല്ലാം എന്നേക്കാള്‍ നന്നായി അയാള്‍ കളിച്ചു. മാനസികമായ ആധിപത്യം കൊണ്ടാണ് ജയിച്ചുകയറാനായത്- മത്സരശേഷം നദാല്‍ വ്യക്തമാക്കി.

ക്ലേ കോര്‍ട്ടില്‍ നദാലിനെതിരേ പോരാടുക ഏറെ ബുദ്ധിമുട്ടാണ്. ഒരു വര്‍ഷം മുമ്പുവരെ ക്ലേ കോര്‍ട്ടില്‍ നദാലിനെതിരേ ഒരൊറ്റ മത്സരത്തില്‍ പോലും വിജയിക്കാനായിട്ടില്ല. പക്ഷേ, മാഡ്രിഡില്‍ വിജയിക്കാനായി. അതുകൊണ്ടു തന്നെ നല്ല ശുഭാപ്തി വിശ്വാസത്തിലാണ്-ഫൈനലിനെ കുറിച്ച് ജൊകോവിക്കിന്റെ പ്രതികരണം ഇതായിരുന്നു.