മിയാമി കിരീടം ജോകോവിക്കിന്

മിയാമി: ആന്‍ഡിമുറെയെ 6-1, 7-6(7-4) എന്ന സ്‌കോറില്‍ കീഴടക്കി ലോക ഒന്നാം നമ്പര്‍ താരം നൊവാക് ജൊകോവിക് മിയാമി മാസ്‌റ്റേഴ്‌സ് കിരീടം നിലനിര്‍ത്തി.

ഇതോടെ മൂന്നാം തവണ മിയാമിയില്‍ കിരീടം നേടുന്ന മൂന്നാമത്തെ താരമെന്ന ഖ്യാതിയും സെര്‍ബിയന്‍ താരത്തിനു സ്വന്തമായി.

തുടക്കം മുതല്‍ ഒടുക്കം വരെ മികച്ച കളി പുറത്തെടുക്കാന്‍ സാധിച്ചതുകൊണ്ടു മാത്രമാണ് പിടിച്ചുനില്‍ക്കാനായത്. ആന്‍ഡി മുറെ മികച്ച താരമാണ്-2009ല്‍ മുറെയ്ക്ക് മുന്നില്‍ മുട്ടുമടക്കിയത് ഓര്‍മ്മിച്ചുകൊണ്ട് ജൊകോവിക് പറഞ്ഞു.

കടുത്ത മത്സരമാണ് നടന്നത്. നൊവാക് മികച്ച ഫോമിലായിരുന്നു. മത്സരത്തിന്റെ നിയന്ത്രണം അദ്ദേഹത്തിനാണെന്ന് എനിക്കു തന്നെ തോന്നി തുടങ്ങിയിരുന്നു. നൂറുശതമാനവും ജൊകോവിക് വിജയം അര്‍ഹിക്കുന്നു-മുറെ വ്യക്തമാക്കി.