ആസ്‌ത്രേലിയന്‍ ഓപണ്‍ തുടങ്ങി

മെല്‍ബണ്‍: ഈ വര്‍ഷത്തെ ആദ്യ ഗ്രാന്‍സ്ലാം ടെന്നിസ് ടൂര്‍ണമെന്റായ ആസ്‌ത്രേലിയന്‍ ഓപണിന് തുടക്കമായി. ടൂര്‍ണമെന്റിന്റെ നൂറാം എഡിഷനാണ് മെല്‍ബണില്‍ തിരിതെളിഞ്ഞത്.

നിലവിലുള്ള ജേതാവും ലോക ഒന്നാം നമ്പര്‍ താരവുമായ നോവാക് ജൊകോവിക് പുരുഷവിഭാഗത്തിലും ഡെന്മാര്‍ക്കിലെ കരോലിന്‍ വോസ്‌നിയാക് വനിതാ വിഭാഗത്തിലും ടോപ്‌സീഡുകളാണ്. കിം ക്ലിസ്‌റ്റേഴ്‌സാണ് നിലവിലുള്ള വനിതാ വിഭാഗം ചാംപ്യന്‍.

ടോപ് സീഡ് വോസ്‌നിയാക്കിയുടെ എതിരാളി 107ാം റാങ്കുകാരിയായ അനസ്‌തേസ്യ റോഡിയോനോവയാണ്. കിം ക്ലിസ്‌റ്റേഴ്‌സിന്റെ എതിരാളി യോഗ്യതാറൗണ്ടിലൂടെയെത്തിയ താരമാണ്. ഓസ്ട്രിയന്‍ താരമായ തമിരാ പസാക്കാണ് രണ്ടാം സീഡ് പെട്രോ ക്വിതോവയുടെ എതിരാളി. മുന്‍ ചാംപ്യനും നാലാം സീഡുമായ മരിയ ഷറപ്പോവ അര്‍ജന്റീനയില്‍ നിന്നുള്ള 67ാം റാങ്കുകാരി ജിസെലോ ഡുല്‍കോയുമായി മാറ്റുരയ്ക്കും.