ഇന്ത്യയുടെ ടെന്നിസ്‌ സ്വപ്‌നങ്ങള്‍ക്ക്‌ അവസാനമായി

ലണ്ടന്‍: ടെന്നിസില്‍ ഇന്ത്യയുടെ ഒളിംപിക്‌സ്‌ പ്രതീക്ഷകള്‍ക്ക്‌ ശനിയാഴ്‌ചയോടെ അവസാനമായി. ടെന്നിസില്‍ ഇന്ത്യയുടെ അവസാന പ്രതീക്ഷയായിരുന്ന മിക്‌സഡ്‌ ഡബിള്‍സ്‌ മത്സരത്തില്‍ നിന്നും ഇന്ത്യന്‍ ടീം പുറത്തായി.

ലിയാണ്ടര്‍ പേസ്‌ - സാനിയ മിര്‍സ സഖ്യത്തിന്‌ ക്വാര്‍ട്ടര്‍ ഫൈനല്‍ റൗണ്ടിലാണ്‌ കാലിടറിയത്‌. ഒന്നാം സീഡായ ബെലാറസിന്റെ മാക്‌സ്‌ മിര്‍നി - വിക്ടോറിയ അസരങ്കെ സഖ്യത്തിനു മുന്നിലാണ്‌ ഇന്ത്യന്‍ സഖ്യം മുട്ടു മടക്കിയത്‌. 5-7, 6-7 ആയിരുന്നു സ്‌കോര്‍.

വെള്ളിയാഴ്‌ച നടന്ന മത്സരം സ്‌കോര്‍ 5-7, 2-3 എത്തിയപ്പോള്‍ വെളിച്ചക്കുറവ്‌ മൂലം ശനിയാഴ്‌ചയിലേക്ക്‌ നീട്ടുകയായിരുന്നു. 47 മിനിറ്റ്‌ നീണ്ടു നിന്ന ഒന്നാമത്തെ സെറ്റ്‌ കടുത്ത പോരാട്ടത്തിനൊടുവില്‍ മാത്രമാണ്‌ മിര്‍നി - അസരങ്കെ സഖ്യത്തിന്‌ നേടാനായത്‌.

ടെന്നിസ്‌ പുരുഷ ഡബിള്‍സില്‍ ഭൂപതി - ബൊപ്പണ്ണ, പേസ്‌ - വിഷ്‌ണു സഖ്യങ്ങള്‍ നേരത്തെ തന്നെ പുറത്തായിരുന്നു.