പേസ്-ഭൂപതി സഖ്യം ഫൈനലില്‍

ടോക്യോ: ഇന്ത്യയുടെ ലിയാണ്ടര്‍ പേസ്-മഹേഷ് ഭൂപതി സഖ്യം ജപ്പാന്‍ ഓപ്പണ്‍ ടെന്നീസ് ടൂര്‍ണമെന്റിന്റെ ഫൈനലില്‍ കടന്നു. സെമിഫൈനലില്‍ നിക്കോളാസ് മാസു-ആന്ദ്രെ സാ സഖ്യത്തെ 6-3, 4-6, 6-2 എന്ന സ്കോറിന് പരാജയപ്പെടുത്തിയാണ് ഇന്ത്യന്‍ സഖ്യം ഫൈനലിലിടം കണ്ടെത്തിയത്.

വെയ്ന്‍ ആര്‍തസ്-ഡൊമിനിക്ക് ഹ്ബാര്‍ട്ടി സഖ്യവും മൈക്കല്‍ ഹില്‍-ജെഫ് തരാംഗോ സഖ്യവും തമ്മിലുള്ള രണ്ടാം സെമിഫൈനലിലെ വിജയിയെയായിരിക്കും പേസ്-ഭൂപതി സഖ്യം ഫൈനലില്‍ നേരിടുക. ഒക്ടോബര്‍ 15-ന് ഞായറാഴ്ചയാണ് ഫൈനല്‍.

കുറേ മാസത്തെ ഇടവേളയ്ക്കു ശേഷം ഭൂപതിയും പേസും ഒളിംപിക്സിനു തൊട്ടുമുമ്പാണ് വീണ്ടും ഒത്തുചേര്‍ന്നത്. എങ്കിലും വിജയത്തിന്റെ താളം കണ്ടെത്താന്‍ അവര്‍ പണിപ്പെട്ട്വരികയായിരുന്നു.