അഗാസി, കാപ്രിയാറ്റി, ഹിംഗിസ് വിജയിച്ചു

പാരിസ്: ഫ്രഞ്ച് ഓപ്പണിന്റെ രണ്ടാംദിവസമായ മെയ് 29 ചൊവാഴ്ച ആന്ദ്രെ അഗാസിയ്ക്കും ജെന്നിഫര്‍ കാപ്രിയാറ്റിയ്ക്കും ജയം. നേരിട്ടുള്ള സെറ്റുകള്‍ക്ക് സ്വീഡന്റെ തോമസ് ജോഹന്‍സനെയാണ് അഗാസി തോല്പിച്ചത്( സ്കോര്‍: 6-2, 6-3, 7-6).

അഗാസിയുടെ 13-ാമത്തെ ഫ്രഞ്ച് ഓപ്പണ്‍ ആണിത്. കഴിഞ്ഞ വര്‍ഷം നിര്‍ഭാഗ്യം കൊണ്ട് അഗാസി രണ്ടാം റൗണ്ടില്‍ ടൂര്‍ണ്ണമെന്റില്‍ നിന്നും പുറത്തായിരുന്നു. എന്നാല്‍ ഈ വര്‍ഷത്തെ ആദ്യ ഗ്രാന്റ് സ്ലാമായ ആസ്ത്രേല്യന്‍ ഓപ്പണ്‍ നേടിയ അഗാസി ആത്മവിശ്വാസത്തിലാണ്.

ടൂര്‍ണ്ണമെന്റില്‍ നാലാം സീഡായ കാപ്രിയാറ്റിയ്ക്കും ജയം അനായാസമായിരുന്നു. ഫ്രാന്‍സിന്റെ എമിലി ലോയ്റ്റിനെയാണ് കാപ്രിയാറ്റി തോല്പിച്ചത് ( സ്കോര്‍ :6-2, 7-5). വനിതാവിഭാഗത്തില്‍ ഒന്നാം സീഡായ മാര്‍ട്ടിന ഹിംഗിസ് സ്പെയിനിന്റെ ഗാല ലിയോണ്‍ ഗാര്‍സ്യയെയാണ് തോല്പിച്ചത്(സ്കോര്‍: 6-1, 6-0).