യുഎസ് ഓപ്പണും സാനിയ കൊയ്‌തെടുത്തു.... ടെന്നീസില്‍ ഇന്ത്യന്‍ വസന്തം

ന്യൂയോര്‍ക്ക്: ടെന്നീസിന്റെ അമേരിയ്ക്കന്‍ മണ്ണില്‍ ഇന്ത്യന്‍ വിജയഗാഥ. യുഎസ് ഓപ്പണില്‍ ലിയാണ്ടര്‍ പേസ്- മാര്‍ട്ടിന ഹിംഗിസ് സഖ്യം മിക്‌സഡ് ഡബിള്‍സില്‍ കിരീടം നേടിയതിനെ പിറകെ വനിത ഡബിള്‍സില്‍ സാനിയ മിര്‍സ- ഹിംഗിസ് സംഖ്യം കിരീടം ഉയര്‍ത്തി.

ഈ സീസണില്‍ സാനിയയുടെ രണ്ടാം ഗ്രാന്‍സ്ലാം കിരീടമാണിത്. വിംബിള്‍ഡണിലും സാനിയ-ഹിംഗിസ് സഖ്യമാണ് വനിത ഡബിള്‍സില്‍ വെന്നിക്കൊടി പാറിച്ചത്.

ടൂര്‍ണമെന്റിലെ ടോപ് സീഡ് ആയ സാനിയ -ഹിംഗിസ് സഖ്യം നാലം സീഡ് ആയ കാസേ ഡെല്ലക്വ- യാരോസ്ലാവ ഷ്വിഡോവ സഖ്യത്തെയാണ് തോല്‍പിച്ചത്. നേരിട്ടുള്ള സെറ്റുകള്‍ക്കായിരുന്നു സാനിയ സഖ്യത്തിന്റെ വിജയം. സ്‌കോര്‍: 6-3, 6-3.

69 മിനിട്ട് നീണ്ടു നിന്ന മത്സരത്തില്‍ സാനിയ-ഹിംഗിസിന്റെ അപ്രമാദിത്തമായിരുന്നു. ഒരു ഘട്ടത്തില്‍ പോലും എതിരാളികള്‍ക്ക് പ്രതിസന്ധി സൃഷ്ടിയ്ക്കാനായില്ല.

സ്വിസ് താരമായ മാര്‍ട്ടിന ഹിംഗിസിനൊപ്പം ചേര്‍ന്നതോടെയാണ് ഡബിള്‍സില്‍ സാനിയ മിര്‍സയുടെ സമയം തെളിയുന്നത്. ഹിംഗിസ് എന്ന ഭാഗ്യ കൂട്ടുകെട്ടില്‍ നിന്നാണ് ലിയാണ്ടര്‍ പേസിനും യുഎസ് ഓപ്പണ്‍ സ്വന്തമാക്കാനായത്.