സിഡ്നി: സിഡ്നി ഇന്റര്നാഷണല് ടെന്നിസ് ഡബിള്സ് കിരീടം സാനിയ മിര്സ-മാര്ട്ടിന ഹിംഗിസ് സഖ്യത്തിന്. തുടര്ച്ചയായ ഏഴാം കിരീട ജയത്തോടെ സാനിയ സഖ്യം വനിതാ ഡബിള്സില് തങ്ങളുടെ അപ്രമാദിത്തം അരക്കിട്ടുറപ്പിച്ചു.
മൂന്നാം സീഡായ കരോലിയ ഗാര്ഷ്യ-ക്രിസ്റ്റിന മാള്ഡനോവിച്ച് സഖ്യത്തെയാണ് സാനിയ സഖ്യം ഫെനലില് തോല്പ്പിച്ചത്. ആദ്യ സെറ്റ് നഷ്ടപ്പെടുത്തിയ ശേഷമാണ് സാനിയ സഖ്യം ജയം സ്വന്തമാക്കിയത്. മത്സരം ഒരു മണിക്കൂര് 14 മിനിറ്റ് നീണ്ട് നിന്നു. സ്കോര്: 1-6, 7-5, 10-5.
പരാജയത്തെ മുഖാമുഖം കണ്ട ശേഷമാണ് സാനിയ സഖ്യം തിരിച്ച് വന്നത്. ആദ്യ ഗെയിം നഷ്ടമാക്കിയ ഇവര് രണ്ടാം ഗെയിമില് 4-1ന് പിന്നിലായിരുന്നു. എന്നാല് പരിചയസമ്പത്തും രണ്ട് പേര്ക്കുമിടയിലെ മനപ്പൊരുത്തവും കളിയിലേക്ക് അവരെ തിരിച്ച് കൊണ്ട് വന്നു.
ടോപ് സീഡുകളായ സാനിയ-ഹിംഗിസ് സഖ്യം തുടര്ച്ചയായി നേടുന്ന 30-ാം ജയമാണിത്. ബ്രിസ്ബെയ്ന് ഓപ്പണിലും സാനിയ-ഹിംഗിസ് സഖ്യം ഈ വര്ഷം കിരീടം ചൂടിയിട്ടുണ്ട്.