അത്ഭുതമായി വീണ്ടും ഫെഡറര്‍; സ്വിസ് ഇന്‍ഡോര്‍ ചാമ്പ്യന്‍ഷിപ്പില്‍ പത്താം കിരീടം

ബാസെല്‍: ടെന്നീസ് ഇതിഹാസം റോജര്‍ ഫെഡറര്‍ സ്വിസ് ഇന്‍ഡോര്‍ ചാമ്പ്യന്‍ഷിപ്പില്‍ പത്താം തവണയും കിരീടം സ്വന്തമാക്കി. ഫൈനലില്‍ ഓസ്‌ട്രേലിയന്‍ കൗമാരതാരം അലക്‌സ് ഡി മിനൗറിനേയാണ് ഫെഡറര്‍ തോല്‍പ്പിച്ചത്. സ്‌കോര്‍ 6-2, 6-2. മത്സരത്തിന്റെ ഒരവസരത്തിലും എതിരാളി ഫെഡറര്‍ക്ക് ഭീഷണിയായില്ല. 38-ാം വയസിലും തന്റെ കളിമികവിന് കോട്ടം തട്ടിയില്ലെന്ന് തെളിയിക്കുന്നതായിരുന്നു ഫെഡററുടെ പ്രകടനം.

കരിയറില്‍ 103-ാം കിരീടമാണ് ഫെഡറര്‍ ബാസെലില്‍ ഉയര്‍ത്തിയത്. ഒരു ടൂര്‍ണമെന്റ് 10-ാം തവണ നേടുന്നത് ഇത് രണ്ടാം തവണയാണ്. നേരത്തെ ഹാലെയിലും ഫെഡറര്‍ ഈ നേട്ടത്തിലെത്തിയിരുന്നു. മിനൗറിനെതിരായ പോരാട്ടത്തില്‍ 10 ബ്രേക്ക് പോയന്റുകളില്‍ 4 ഫെഡറര്‍ ജയം കണ്ടെത്തി. 68 മിനിറ്റ് നീണ്ടുനിന്ന മത്സരത്തില്‍ ഒരിക്കല്‍പ്പോലും സര്‍വ് ഡ്രോപ് ചെയ്തില്ല.

ഫ്രഞ്ച് ഓപ്പണ്‍ ബാഡ്മിന്റണ്‍ ഫൈനലില്‍ നിരാശ; സാത്വിക്കിനും ചിരാഗിനും വെള്ളി

മികച്ച മത്സരമാണ് കളിച്ചതെന്ന് ഫെഡറര്‍ മത്സരശേഷം പറഞ്ഞു. അലക്‌സ് ടൂര്‍ണമെന്റില്‍ മികച്ച പ്രകടനമാണ് കാഴ്ചവെച്ചത്. ഇരുവരും ഇപ്പോള്‍ സന്തോഷത്തിലായിരിക്കുമെന്നാണ് കരുതുന്നതെന്നും സ്വന്തം നാട്ടില്‍ പത്താം കിരീടം ഉയര്‍ത്താന്‍ കഴിഞ്ഞത് വലിയ അനുഭവമാണെന്നും ഫെഡറര്‍ പറഞ്ഞു. നേരത്തെ സെമിയില്‍ ജയിച്ചതോടെ ഈ സീസണില്‍ 50-ാം ജയവും ഫെഡറര്‍ സ്വന്തമാക്കിയിരുന്നു. പതിനാറാം തവണയാണ് ഫെഡറര്‍ ഒരു സീസണില്‍ ഇത്രയും മത്സരങ്ങള്‍ ജയിക്കുന്നത്. ഈ റെക്കോര്‍ഡും ഫെഡററുടെ പേരിലാണ്.