റിയോ ഒളിംപിക്‌സ്: സെമിയില്‍ സാനിയ- ബൊപ്പണ്ണ സഖ്യം പതറി, ഇനി പ്രതീക്ഷ വെങ്കലത്തില്‍

റിയോ ഡി ജനീറോ: റിയോ ഒളിംപിക്‌സിലെ ടെന്നീസ് മിക്‌സഡ് ഡബിള്‍സില്‍ ഇന്ത്യയുടെ മെഡല്‍ സ്വപ്‌നങ്ങള്‍ക്ക് തിരിച്ചടി. നാലാം സീഡായ സാനിയ- ബൊപ്പണ്ണ സഖ്യം സെമിയില്‍ പുറത്തായതോടെ വെള്ളി മെഡലെന്ന ഇന്ത്യയുടെ പ്രതീക്ഷയും അവസാനിച്ചു. അമേരിക്കയുടെ വീനസ് വില്യംസ്- രാജീവ് റാം സഖ്യത്തോടായിരുന്നു സാനിയ- ബൊപ്പണ്ണ സഖ്യം പരാജയപ്പെട്ടത്.

ആദ്യ സെറ്റ് മത്സരം 6-2 ന് ഇന്ത്യന്‍ ടീം സ്വന്തമാക്കിയെങ്കിലും രണ്ടാം സെറ്റില്‍ വീനസ്- രാജീവ് റാം സഖ്യത്തിന്റെ തിരിച്ചുവരവിന് മുമ്പില്‍ പിടിച്ചു നില്‍ക്കാന്‍ ഇന്ത്യന്‍ സഖ്യത്തിന് കഴിഞ്ഞില്ല. അമേരിക്കന്‍ സഖ്യം 6.2 ന് സെറ്റ് സ്വന്തമാക്കിയതേടെ ട്രൈ ബ്രേക്കറിലേക്ക് കടന്ന മത്സരത്തിന്റെ ആദ്യഘട്ടത്തില്‍ 3-1 ന് മുന്നിട്ടു നിന്ന ഇന്ത്യന്‍ സഖ്യത്തിന് മേധാവിത്വം നിലനിര്‍ത്താന്‍ കഴിഞ്ഞില്ല. ടൈ ബ്രേക്കറില്‍ 10-3 നായിരുന്നുഅമേരിക്കന്‍ ടീം ഫൈനലിലേക്ക് കടന്നത്.

സെമിയില്‍ നിന്ന് പുറത്തായതോടെ ഇന്ത്യക്ക് മുമ്പിലുള്ള ഏക ആശ്വാസം വെങ്കലത്തിനായുള്ള മത്സരത്തില്‍ പങ്കെടുക്കുക മാത്രമാണ്. ഞായറാഴ്ച രാത്രി 8.30 ന് നടക്കുന്ന നടക്കുന്ന യുഎസ്- ചെക്ക് റിപ്പബ്ലിക്ക് മത്സരത്തില്‍ തോല്‍ക്കുന്നവരായിരിക്കും ഇന്ത്യയുടെ എതിരാളികള്‍. ടെന്നീസില്‍ പുരുഷ, വനിതാ ഡബിള്‍സിലേറ്റ തിരിച്ചടിയില്‍ നിന്ന് ആശ്വാസം പകര്‍ന്നത് ഇന്ത്യന്‍ ടീം മിക്‌സഡ് ഡബിള്‍സ് സെമിയില്‍ കടന്നതാണ്. ഇന്ത്യയെ കാത്തിരിക്കുന്ന മെഡല്‍ പ്രതീക്ഷകള്‍ക്ക് വേണ്ടിയുള്ള കാത്തിരിപ്പുകള്‍ ഇനിയും നീളും.