നഷ്ടമാക്കരുത് ടെന്നിസിലെ ഈ എല്‍ ക്ലാസിക്കോ, ഇത് അവസാനത്തേത് ?

ആറു വര്‍ഷം നീണ്ട കാത്തിരിപ്പിനൊടുവിലാണ് ഗ്രാന്റ്സ്ലാം ഫൈനലില്‍ ഫെഡററും നദാലും അങ്കം കുറിക്കുന്നത്. ഇതിനുമുമ്പ് 2011ലെ ഫ്രഞ്ച് ഓപണ്‍ ഫൈനലിലായിരുന്നു ഇത്. അന്നു നദാലിനായിരുന്നു വിജയം.

എട്ടു തവണ ഗ്രാന്റ്സ്ലാം ഫൈനലുകളില്‍ ഫെഡററും നദാലും ഏറ്റുമുട്ടിയിട്ടുണ്ട്. ഇതില്‍ രണ്ടു തവണ മാത്രമേ ഫെഡറര്‍ക്കു ജയിക്കാനായിട്ടുള്ളൂ (2006, 07). ശേഷിച്ച ആറു തവണയും നദാലാണ് വെന്നിക്കൊടി പാറിച്ചത് (2006, 07, 08, 09,11)

ഫൈനലില്‍ മാത്രമല്ല ഇതുവരെയുള്ള കണക്കുകളിലും ഫെഡറര്‍ക്കെതിരേ നദാലിനു തന്നെയാണ് മേല്‍ക്കൈ. 34 തവണ ഇരുതാരങ്ങളും ശക്തി പരീക്ഷിച്ചപ്പോള്‍ 23ലും ജയം നദാലിനായിരുന്നു. 11 കളികളിലാണ് ഫെഡറര്‍ ജയിച്ചത്.

ഇത്തവണത്തെ ഓസ്‌ട്രേലിയന്‍ ഓപ്പണ്‍ സീഡിങില്‍ ഫെഡററാണ് മുന്നില്‍. ഫെഡറര്‍ ഒമ്പതാം സീഡും നദാല്‍ 17ാം സീഡുമാണ്

ടെന്നിസ് ലോകം ഒട്ടും പ്രതീക്ഷിക്കാത്ത ഫൈനലാണ് ഇത്തവണത്തേത്. ലോക ഒന്നാംനമ്പര്‍ ബ്രിട്ടീഷ് താരം ആന്‍ഡി മുറേയ്ക്കായിരുന്നു ഏറ്റവുമധികം കിരീടസാധ്യത കല്‍പ്പിച്ചിരുന്നത്. സാധ്യതയില്‍ തൊട്ടു പിറകിലുണ്ടായിരുന്നത് ലോക രണ്ടാം നമ്പര്‍ ജോക്കോവിച്ചായിരുന്നു. എന്നാല്‍ ഇരുവരും പാതിവഴിയില്‍ കാലിടറി വീണപ്പോള്‍ ഫെഡററും നദാലും തമ്മിലുള്ള സ്വപ്ന ഫൈനലിന് അരങ്ങൊരുങ്ങുകയായിരുന്നു.

ടെന്നിസ് കോര്‍ട്ടില്‍ ബദ്ധശത്രുക്കളാണെങ്കിലും കോര്‍ട്ടിനു പുറത്ത് ഉറ്റമിത്രങ്ങളാണ് ഫെഡററും നദാലും. ഇരുതാരങ്ങളും നിരവധി തവണ ഇതു പറഞ്ഞിട്ടുമുണ്ട്.

31 ഗ്രാന്റ്സ്ലാം ട്രോഫികളാണ് ഫെഡററും നദാലും പങ്കിട്ടത്. 17 കിരീടങ്ങളുമായി ഫെഡറര്‍ ഒന്നാംസ്ഥാനത്തു നില്‍ക്കുമ്പോള്‍ 14 ട്രോഫികളുമായി നദാല്‍ തൊട്ടരികിലുണ്ട്.

പരിക്കിനെ തോല്‍പ്പിച്ചാണ് ഫെഡററും നദാലും ഇത്തവണ ഓസ്‌ട്രേലിയന്‍ ഓപ്പണിനെത്തിയത്. കാല്‍മുട്ടിനേറ്റ പരിക്കിനെ തുടര്‍ന്നു 2016ന്റെ രണ്ടാംപകുതിയില്‍ ഫെഡറര്‍ക്കു കളിക്കാനായിരുന്നില്ല. മറുഭാഗത്ത് നദാലും പരിക്കിന്റെ പിടിയിലായിരുന്നു. പരിക്കുമൂലം 2016ലെ ഫ്രഞ്ച് ഓപ്പണ്‍ നഷ്ടമായ നദാലിനു വിംബിള്‍ഡണിനും കളിക്കാനായിരുന്നില്ല.

2015ലെ ബാസെല്‍ ഓപണ്‍ ചാംപ്യന്‍ഷിപ്പിന്റെ ഫൈനലിലാണ് ഫെഡററും നദാലും മാറ്റുരച്ചത്. അന്നു ജയം ഫെഡറര്‍ക്കൊപ്പമായിരുന്നു. തുടര്‍ച്ചയായ അഞ്ചു ജയങ്ങള്‍ക്കു ശേഷം നദാലിനെതിരേ ഫെഡററുടെ ആദ്യ ജയം കൂടിയായിരുന്നു ഇത്.