മുംബൈ ഇന്ത്യന്സില് അവസരം നല്കിയില്ല
ഐപിഎല് 2019ല് കൂടുതല് മത്സരങ്ങളില് കളിക്കാന് കഴിഞ്ഞിരുന്നെങ്കില് സംതൃപ്തിയോടെ വിരമിക്കാമായിരുന്നെന്ന് യുവരാജ് വിരമിക്കല് വേളയില് പറഞ്ഞിരുന്നു. കഴിഞ്ഞവര്ഷംതന്നെ ഇത്തവണ വിരമിക്കുന്ന കാര്യം തീരുമാനിച്ചിരുന്നു. ജീവിതത്തില് എല്ലാ ആഗ്രഹങ്ങളും നടക്കില്ലല്ലോ എന്നാണ് ഇത്തവണ ഐപിഎല്ലില് അവസരം കുറഞ്ഞതിനെക്കുറിച്ച് യുവിയുടെ പ്രതികരണം.
അര്ഹിക്കുന്ന യാത്രയയപ്പ് ലഭിച്ചില്ല
ഐപിഎല്ലില് യുവരാജിനേക്കാള് മോശം പ്രകടനം നടത്തിയ കളിക്കാര് മുംബൈ ടീമിലുണ്ടായിരുന്നു. അതുകൊണ്ടുതന്നെ യുവിയെ പുറത്തിരുത്തിയതിന് ന്യായീകരണമില്ല. താരം ഐപിഎല്ലില്നിന്നും വിരമിക്കും എന്നറിയാമായിരുന്നിട്ടും അര്ഹിക്കുന്ന യാത്രയയപ്പ് നല്കാന് ക്യാപ്റ്റന് രോഹിത് ശര്മയ്ക്കും ടീം മാനേജ്മെന്റിനും കഴിഞ്ഞില്ല. യുവരാജിനെ തഴഞ്ഞത് എന്തിനാണെന്നാണ് ഇപ്പോള് സോഷ്യല് മീഡിയ ചോദിക്കുന്നത്.
യുവരാജിനെ തഴഞ്ഞതാര്
സച്ചിന് ടെണ്ടുല്ക്കര്ക്ക് വേണ്ടി ലോകകപ്പ് നേടുമെന്ന് പ്രതിജ്ഞ ചെയ്യുകയും അത് നേടുകയും ചെയ്ത താരമാണ് യുവരാജ്. എന്നാല്, സച്ചിന് കൂടി ഭാഗമായ മുംബൈ ഇന്ത്യന്സില് യുവരാജിന് വേണ്ട പരിഗണന ലഭിച്ചില്ല. യുവരാജിന് ശരിയായ യാത്രയയപ്പ് ലഭിച്ചില്ലെന്നാണ് രോഹിത് ശര്മയുടെ പ്രതികരണം. മുംബൈ ടീമില് യുവരാജിന് അവസരം നല്കാന് രോഹിത് ശ്രമിച്ചിരുന്നെങ്കിലും ടീം മാനേജ്മെന്റ് പരിഗണിച്ചില്ലെന്നുവേണം കരുതാന്.
യുവരാജ് ഇനി മറ്റു ലീഗുകളില്
ഐപിഎല്ലില് അവസരം ലഭിച്ചില്ലെങ്കിലും ലോകത്തെ മറ്റു ലീഗുകളില് യുവരാജിനെ ഇനി കാണാന് സാധിക്കും. അന്താരാഷ്ട്ര ക്രിക്കറ്റില്നിന്നും വിരമിച്ചതോടെ ബിസിസിഐ ഇതിനായി അനുമതി നല്കുമെന്നാണ് കരുതുന്നത്. ആസ്വദിച്ചു കളിക്കാവുന്ന ലീഗുകളിലാണ് ഇനി കളിക്കാന് പോകുന്നതെന്ന് താരം അറിയിച്ചു. ഒന്നോ രണ്ടോ വര്ഷം കൂടി ക്രിക്കറ്റ് കളിക്കാനാണ് യുവരാജിന്റെ തീരുമാനം.