സെഞ്ച്വറിയടിച്ചിട്ടും ടീം തോറ്റു; സഞ്ജു സാംസണ്‍ ഒടുവില്‍ വാര്‍ണറോട് പറഞ്ഞത്

എന്റെ ദിവസം നിങ്ങള്‍ ഇല്ലാതാക്കി

മത്സരശേഷം ഡേവിഡ് വാര്‍ണറുമൊത്തുള്ള ഒരു ചാനല്‍ പരിപാടിയില്‍ സഞ്ജു സാംസണ്‍ നിരാശ മറച്ചുപിടിച്ചില്ല. താങ്കള്‍ എന്റെ ദിവസം ഇല്ലാതാക്കിയെന്നായിരുന്നു സഞ്ജു വാര്‍ണറോട് പറഞ്ഞത്. താങ്കള്‍ ബാറ്റ് ചെയ്യുന്ന രീതിക്ക് തന്റെ 100 റണ്‍സും മതിയാകുമായിരുന്നില്ല. 250 റണ്‍സെങ്കിലും ബോര്‍ഡിലുണ്ടെങ്കിലേ താങ്കളെപ്പോലെ ഒരാള്‍ ഉള്ള ടീമിനോട് ജയിക്കാന്‍ കഴിയൂ എന്നും സഞ്ജു പറഞ്ഞു.

വാര്‍ണറുടെ പ്രതികരണം

തുടക്കം നന്നായി ലഭിച്ചാല്‍ ബാറ്റ്‌സ്മാന് ആത്മവിശ്വാസം ലഭിക്കുമെന്നാണ് വാര്‍ണര്‍ തന്റെ ബാറ്റിങ്ങിനെക്കുറിച്ച് പറഞ്ഞത്. ആദ്യ ആറ് ഓവറില്‍തന്നെ നന്നായി തുടങ്ങാന്‍ ശ്രമിക്കുക. ഞങ്ങള്‍ക്ക് നല്ല തുടക്കം ലഭിച്ചു. അത് വിജയത്തിലെത്തിക്കാന്‍ കഴിഞ്ഞെന്നും വാര്‍ണര്‍ പറഞ്ഞു. 2 മത്സരങ്ങളില്‍നിന്നും 154 റണ്‍സെടുത്ത വാര്‍ണര്‍ ആണ് ഇപ്പോള്‍ ലീഗിലെ ടോപ് സ്‌കോറര്‍. 132 റണ്‍സെടുത്ത സഞ്ജു തൊട്ടുപിറകിലുണ്ട്.

സഞ്ജുവിനൊപ്പം രഹാനെയും

നേരത്തെ 54 പന്തിലാണ് സഞ്ജു തന്റെ രണ്ടാം ഐപിഎല്‍ സെഞ്ച്വറി കണ്ടെത്തിയത്. 55 പന്തുകള്‍ നേരിട്ട താരത്തിന്റെ ഇന്നിങ്സില്‍ 10 ബൗണ്ടറകളും നാലു സിക്സറുമുണ്ടായിരുന്നു. ക്യാപ്റ്റന്‍ അജിങ്ക്യ രഹാനെയാണ് (70) ടീമിന്റെ മറ്റൊരു പ്രധാന സ്‌കോറര്‍. രണ്ടാം വിക്കറ്റില്‍ ഇരുവരും ചേര്‍ന്ന് 118 റണ്‍സ് ടീം സ്‌കോറിലേക്കു കൂട്ടിച്ചേര്‍ത്തു. അപരാജിതമായ മൂന്നാം വിക്കറ്റില്‍ ബെന്‍ സ്റ്റോക്സിനൊപ്പം (16*) 25 പന്തില്‍ 64 റണ്‍സിന്റെ കൂട്ടുകെട്ടുണ്ടാക്കാനും സഞ്ജുവിന് സാധിച്ചു.