ഇന്ത്യന്‍ ക്യാപ്റ്റനെന്ന നിലയില്‍ ലോകകപ്പില്‍ ചരിത്രമെഴുതി വിരാട് കോലി

കോലിക്ക് മറ്റൊരു റെക്കോര്‍ഡ്

വെസ്റ്റിന്‍ഡീസിനെതിരെ ആധികാരിക ജയം സ്വന്തമാക്കിയതോടെ ഇന്ത്യന്‍ ക്യാപ്റ്റന്‍ വിരാട് കോലിയെ തേടി ഒരു റെക്കോര്‍ഡും എത്തിക്കഴിഞ്ഞു. ലോകകപ്പിലെ ആദ്യ ആറു മത്സരങ്ങളും തോല്‍ക്കാതിരിക്കുന്ന ആദ്യ ഇന്ത്യന്‍ ക്യാപ്റ്റനെന്ന ബഹുമതിയാണ് കോലിയെ തേടിയെത്തിയത്. വിന്‍ഡീസിനെതിരായ മത്സരത്തില്‍ കോലി 72 റണ്‍സുമായി ഇന്ത്യയുടെ ടോപ് സ്‌കോറര്‍ കൂടിയാണ്. ഇതേ മത്സരത്തില്‍ അന്താരാഷ്ട്ര ക്രിക്കറ്റില്‍ അതിവേഗം 20,000 റണ്‍സ് തികയ്ക്കുന്ന ബാറ്റ്‌സ്മാന്‍ കൂടിയായി കോലി. സച്ചിന്‍ ടെണ്ടുല്‍ക്കര്‍, ബ്രയാന്‍ ലാറ എന്നിവരുടെ റെക്കോര്‍ഡ് ആണ് കോലി മറികടന്നത്.

ഇംഗ്ലണ്ടിനെതിരായ മത്സരം

ലോകകപ്പില്‍ സൗത്ത് ആഫ്രിക്ക, ഓസ്‌ട്രേലിയ, പാക്കിസ്ഥാന്‍, അഫ്ഗാനിസ്ഥാന്‍, വെസ്റ്റിന്‍ഡീസ് എന്നീ ടീമുകളെ ഇന്ത്യ തോല്‍പ്പിച്ചുകഴിഞ്ഞു. ഇംഗ്ലണ്ടിനെ കൂടി തോല്‍പ്പിച്ചാല്‍ മുന്‍നിര ടീമുകള്‍ക്കെതിരായ വിജയം പൂര്‍ണമാകും. ലോകകപ്പ് സെമി ഉറപ്പിക്കാന്‍ ഇന്ത്യയ്‌ക്കെതിരായ ജയം ഇംഗ്ലണ്ടിന് അനിവാര്യമാണ്. ലോകകപ്പ് ഫൈനലില്‍ ഏറ്റുമുട്ടുമെന്ന് പ്രവചിക്കപ്പെടുന്ന ടീമുകളാണ് ഇന്ത്യയും ഇംഗ്ലണ്ടും.

ബാറ്റ്‌സ്മാന്മാരുടെ പ്രകടനം

ഇത്തവണ അഫ്ഗാനിസ്ഥാനോട് മാത്രമാണ് ഇന്ത്യ വിയര്‍ത്തു ജയിച്ചത്. ദുര്‍ബലരെന്ന് കരുതപ്പെട്ടിരുന്ന അഫ്ഗാനിസ്ഥാന്‍ അവസാന ഓവറില്‍ ഇന്ത്യയ്‌ക്കെതിരെ കീഴടങ്ങുകയായിരുന്നു. ഇന്ത്യയെ കുറഞ്ഞ സ്‌കോറില്‍ ഒതുക്കാനായത് അഫ്ഗാന്റെ നേട്ടമായി. തുടര്‍ച്ചയായ രണ്ടാം മത്സരത്തിലും ഇന്ത്യന്‍ ബാറ്റ്‌സ്മാന്മാര്‍ പ്രതീക്ഷിച്ച പ്രകടനം പുറത്തെടുത്തില്ലെങ്കിലും ബൗളിങ്ങിലൂടെ വിന്‍ഡീസിനെതിരെ വിജയം പിടിച്ചെടുക്കുകയായിരുന്നു.