പോസിറ്റീവ് ഒന്നു മാത്രം
മല്സരശേഷം ഷാരൂഖ് പോസ്റ്റ് ചെയ്ത ഒരു ട്വീറ്റാണ് ഇപ്പോള് വൈറലായിക്കൊണ്ടിരിക്കുന്നത്. ശുഭ്മാന് ഗില്ലും ആന്ദ്രെ റസ്സലും നല്ല പ്രകടനം നടത്തി. തോല്ക്കുന്നതു സഹിക്കാം, എന്നാല് പൊരുതാതെ തോല്ക്കുന്നത് നിരാശജനകമാണ്. പ്രത്യേകിച്ച് ബൗളര്മാര് വിജയതൃഷ്ണ കാണിച്ചില്ല. ഇതു ദുഖമുണ്ടാക്കുന്നു. കളിയിലെ പോസിറ്റീവായ ഏക കാര്യം ഞങ്ങളുടെ ദാദ സൗരവ് ഗാംഗുലി ജയിച്ച ടീമിനൊപ്പം ഈഡനില് ഉണ്ടായിരുന്നുവെന്നതാണ്. ഡല്ഹി ക്യാപ്പിറ്റല്സിന് അഭിനന്ദനങ്ങള് എന്നായിരുന്നു എസ്ആര്കെയുടെ ട്വീറ്റ്.
അനായാസ ജയം
കെകെആറിനെതിരേ അനായാസ ജയമാണ് ഈഡന് ഗാര്ഡന്സില് ഡല്ഹി സ്വന്തമാക്കിയത്. ആദ്യം ബാറ്റ് ചെയ്ത കെകെആര് നിശ്ചിത ഓവറില് ഏഴു വിക്കറ്റിന് 178 റണ്സാണ് നേടിയത്. ഓപ്പണര് ശുഭ്മാന് ഗില്ലിന്റെയും (65), സൂപ്പര് താരം ആന്ദ്രെ റസ്സലിന്റെയും (45) ഇന്നിങ്സുകളാണ് കെകെആറിനെ മികച്ച സ്കോറിലെത്തിച്ചത്.
മറുപിടിയില് ശിഖര് ധവാനും (97*) റിഷഭ് പന്തും (46) മിന്നിയപ്പോള് 18.5 ഓവറില് മൂന്നു വിക്കറ്റ് മാത്രം നഷ്ടത്തില് ഡല്ഹി ലക്ഷ്യത്തിലെത്തുകയായിരുന്നു.
ബൗളര്മാര് നിരാശപ്പെടുത്തി
ജയിക്കാവുന്ന സ്കോര് ആയിട്ടും ഡല്ഹിയെ സമ്മര്ദ്ദത്തിലാക്കാന് പോലുമാവാതെയാണ് കൊല്ക്കത്ത കീഴടങ്ങിയത്. കെകെആര് നായകന് ദിനേഷ് കാര്ത്തിക് ഏഴു ബൗളര്മാരെയാണ് മല്സരത്തില് പരീക്ഷിച്ചത്. ഇവരില് രണ്ടോവറില് 12 റണ്സിന് ഒരു വിക്കറ്റെടുത്ത നിതീഷ് റാണ മാത്രമേ ഭേദപ്പെട്ട പ്രകടനം നടത്തിയുള്ളൂ.
ലോക്കി ഫെര്ഗൂസന്, പിയൂഷ് ചൗള, കാര്ലോസ് ബ്രാത്വെയ്റ്റ് എന്നിവര് 12.33, 12.35, 13 എന്നിങ്ങനെ ഇക്കോണമി റേറ്റിലാണ് റണ്സ് വഴങ്ങിയത്.