ജഡേജ കഠിനമായ വിഷാദത്തിലെന്ന് ഭാര്യ; ഒരേ കാര്യം പറഞ്ഞുകൊണ്ടിരിക്കുന്നു

ജഡേജ വിഷാദത്തില്‍

തോല്‍വിക്കുശേഷം ഇന്ത്യന്‍ കളിക്കാര്‍ ഉല്ലാസയാത്രയ്ക്കും മറ്റും സമയം കണ്ടെത്തിയെങ്കിലും ജഡേജ ഇപ്പോഴും കടുത്ത വിഷാദത്തിലാണെന്നാണ് ഭാര്യ റിവാബ പറയുന്നത്. സമാധാനിപ്പിക്കാന്‍ കഴിയാത്തവിധം ജഡേജ തളര്‍ന്നിരുന്നു. താന്‍ പുറത്തായില്ലായിരുന്നുവെങ്കില്‍ ടീമിന് വിജയിക്കാന്‍ സാധിക്കുമായിരുന്നുവെന്ന കാര്യമാണ് ഇടയ്ക്കിടെ പറയുന്നതെന്നും റിവാബ ഒരു മാധ്യമത്തോടെ വെളിപ്പെടുത്തി.

ഏല്ലായിപ്പോഴും പോരാളി

ജയത്തിനരികില്‍വെച്ച് ഇത്തരമൊരു മത്സരം തോല്‍ക്കുകയെന്നാല്‍ വേദനപ്പിക്കുന്നതാണ്. ജഡേജ എക്കാലത്തും കരുത്തോടെ പോരാടിയിരുന്നെന്നും ഭാര്യ പറഞ്ഞു. അദ്ദേഹത്തിന്റെ കരിയര്‍ ശ്രദ്ധിച്ചാല്‍ അക്കാര്യം വ്യക്തമാകും. 2013ല്‍ ചാമ്പ്യന്‍സ് ട്രോഫി ഫൈനലില്‍ ഓള്‍റൗണ്ട് പ്രകടനത്തോടെ ജഡേജ ആയിരുന്നു മാന്‍ ഓഫ് ദി മാച്ച്. പ്രധാനപ്പെട്ട മത്സരങ്ങളില്‍ വിക്കറ്റ് വീഴ്ത്താനും റണ്‍സ് നേടാനും അദ്ദേഹത്തിന് സാധിച്ചിട്ടുണ്ടെന്നും റിവാബ ചൂണ്ടിക്കാട്ടി.

ന്യൂസിലന്‍ഡിനെതിരായ പ്രകടനം

ന്യൂസിലന്‍ഡിനെതിരെ കടന്നാക്രമണം നടത്തിയ ജഡേജ 59 പന്തിലാണ് 77 റണ്‍സെടുത്തത്. അര്‍ധശതകം നേടിയ ധോണിക്കൊപ്പം ചേര്‍ന്ന് ഏഴാം വിക്കറ്റില്‍ സെഞ്ച്വറി കൂട്ടുകെട്ടുണ്ടാക്കാനും താരത്തിന് കഴിഞ്ഞു. എന്നാല്‍, ജയത്തിനടുത്തുവെച്ച് കൂറ്റനടിക്ക് ശ്രമിക്കവെ പുറത്താവുകയായിരുന്നു. ഇതോടെ ന്യൂസിലന്‍ഡ് ഉയര്‍ത്തിയ 240 റണ്‍സ് എന്ന വിജയലക്ഷ്യം പിന്തുടരാനും ഇന്ത്യയ്ക്ക് കഴിഞ്ഞില്ല.