രാജ്യവര്ധന് സിങ് റഥോഡും കൃഷ്ണ പൂണിയയും
കേന്ദ്ര കായികമന്ത്രിയെന്ന നിലയില് മികച്ച സേവനം കാഴ്ചവെച്ച മുന് ഒളിമ്പിക്സ് ഷൂട്ടിങ് മെഡല് ജേതാവ് രാജ്യവര്ദ്ധന് സിങ് റാഥോഡ് ഇത്തവണയും ബിജെപി ടിക്കറ്റില് ജയിച്ചുകയറി. ജയ്പൂര് റൂറലില് മത്സരിച്ച താരം 63.83 ശതമാനം വോട്ടുകളാണ് നേടിയത്. അതേസമയം റാഥോഡിനെതിരെ മത്സരിച്ച മുന് ഡിസ്കസ് താരം കൃഷ്ണ പൂണിയയ്ക്ക് 33.8 ശതമാനം വോട്ടുകള്മാത്രമാണ് ലഭിച്ചത്.
ഗൗതം ഗംഭീറും കീര്ത്തി ആസാദും
ബിജെപി ടിക്കറ്റില് ദില്ലി ഈസ്റ്റില് മത്സരിച്ച മുന് ക്രിക്കറ്റ് താരം ഗൗതം ഗഭീര് 3.91 ലക്ഷം വോട്ടുകള്ക്ക് കോണ്ഗ്രസിന്റെ അര്വിന്ദര് സിങ് ലൗലിയെ പരാജയപ്പെടുത്തി. മുന് ക്രിക്കറ്റ് താരം കീര്ത്തി ആസാദിന് തോല്വിയായിരുന്നു ഫലം. ജാര്ഖണ്ഡിലെ ധന്ബാദില് കോണ്ഗ്രസ് ടിക്കറ്റില് മത്സരിച്ച ആസാദ് ബിജെപി സ്ഥാനാര്ഥി പശുപതി നാഥിനോട് തോറ്റു. 1983ല് ലോകകപ്പ് നേടിയ ടീമില് അംഗമായിരുന്നു കീര്ത്തി ആസാദ്.
വിജേന്ദര് സിങ്
കോണ്ഗ്രസിനുവേണ്ടി മത്സരിച്ച ബോക്സര് വിജേന്ദര് സിങ് മൂന്നാം സ്ഥാനത്തേക്ക് പുറംതള്ളപ്പെട്ടു. സൗത്ത് ദില്ലിയില് ബിജെപിയുടെ രമേഷ് ബിഥൂരി 54.2 ശതമാനം വോട്ടുകള് നേടിയപ്പോള് ആം ആദ്മി പാര്ട്ടിയുടെ രാഘവ് ഛദ്ദ 27.6 ശതമാനവും വിജേന്ദറിന് 15.2 ശതമാനവും വോട്ടുകള് മാത്രമാണ് ലഭിച്ചത്. ഒളിമ്പിക്സ് മെഡല് ജേതാവായ വിജേന്ദര് ഇപ്പോള് പ്രൊഫഷണല് ബോക്സിങ്ങില് സജീവമാണ്.