ഗവാസ്‌കര്‍, സച്ചിന്‍, ദ്രാവിഡ്... ധോണി അതുക്കുംമേലെ, മുന്‍ നായകനെക്കുറിച്ച് കപില്‍ പറഞ്ഞത്

ധോണിയോളം വരില്ല മറ്റൊരാളും

ഒരു ദേശീയ ചാനലിനോടു സംസാരിക്കവെയാണ് ധോണിയെ കപില്‍ പ്രശംസ കൊണ്ടു മൂടിയത്. ധോണിയെക്കുറിച്ചു പ്രത്യേകിച്ചൊന്നും പറയേണ്ട ആവശ്യമില്ല. രാജ്യത്തെ വളരെ മികച്ച രീതിയിലാണ് അദ്ദേഹം സേവിച്ചുകൊണ്ടിരിക്കുന്നത്.
ധോണിയെപ്പോലെ ഇന്ത്യയെ സേവിച്ച മറ്റൊരു ക്രിക്കറ്ററില്ല. അക്കാര്യത്തില്‍ ധോണി ഏറെ ബഹുമാനം അര്‍ഹിക്കുന്നതായും കപില്‍ അഭിപ്രായപ്പെട്ടു.

വീണ്ടുമൊരു ലോകകിരീടം കൊണ്ടുവരും

ഇത്തവണ ഇംഗ്ലണ്ടില്‍ നടക്കാനിരിക്കുന്ന ലോകകപ്പില്‍ മറ്റൊരു കിരീടം കൂടി ഇന്ത്യയിലേക്കു കൊണ്ടു വരാന്‍ ധോണിക്കു സാധിക്കുമെന്നാണ് പ്രതീക്ഷയെന്നു കപില്‍ വ്യക്തമാക്കി. എത്ര കാലം ധോണി ക്രിക്കറ്റില്‍ തുടരുമെന്ന് ആര്‍ക്കും പറയാന്‍ സാധിക്കില്ല. സ്വന്തം ശരീരം അനുവദിക്കുന്നിടത്തോളം കാലം അദ്ദേഹം കളി തുടരുമെന്നാണ് പ്രതീക്ഷിക്കുന്നത്. ധോണിക്ക് ഈ ലോകകപ്പില്‍ എല്ലാവിധ ആശംസകളും നേരുകയാണ് എല്ലാവരും ചെയ്യേണ്ടത്. ഈ ലോകകപ്പ് കൂടി അദ്ദേഹം ടീമിനു സമ്മാനിക്കുമെന്നു വിശ്വസിക്കുന്നതായും കപില്‍ കൂട്ടിച്ചേര്‍ത്തു.

ഇന്ത്യക്കു എളുപ്പമാവില്ല

ലോകകപ്പില്‍ ശക്തമായ ടീമിനെ തന്നെയാണ് ഇന്ത്യ അണിനിരത്തുന്നതെന്നു കപില്‍ പറഞ്ഞു. മികച്ച ഒരുപിടി താരങ്ങള്‍ ഇന്ത്യന്‍ ടീമിലുണ്ട്. എന്നാല്‍ ലോകകപ്പ് ജയിക്കുക വിരാട് കോലിക്കും സംഘത്തിനും എളുപ്പമാവില്ല. ഒരു ടീമായി ലോകകപ്പില്‍ ഇന്ത്യ ഒത്തിണക്കത്തോടെ കളിക്കണം. ടീമിലെ ആര്‍ക്കും പരിക്കേല്‍ക്കരുതെന്നാണ് ആശിക്കുന്നത്. ഭാഗ്യം കൂടി ഒപ്പം നിന്നാല്‍ ഇന്ത്യക്കു തീര്‍ച്ചയായും ലോകകിരീടവുമായി മടങ്ങാന്‍ കഴിയുമെന്നും ഇന്ത്യക്കു ആദ്യ ലോകകപ്പ് സമ്മാനിച്ച ക്യാപ്റ്റന്‍ അഭിപ്രായപ്പെട്ടു.