പ്രണയസാഫല്യം; കിംഗ്‌സ് ഇലവന്‍ പഞ്ചാബ് താരം മായങ്ക് അഗര്‍വാള്‍ വിവാഹിതനായി

ബെംഗളുരു: കര്‍ണാടകയില്‍ നിന്നുമുള്ള കിംഗ്‌സ് ഇലവന്‍ പഞ്ചാബ് താരം മായങ്ക് അഗര്‍വാള്‍ വിവാഹിതനായി. ദീര്‍ഘകാല പ്രണയിനി അഷിത സൂദിനെയാണ് മായങ്ക് ജീവിതത്തിലേക്ക് കൈപിടിച്ച് കൂട്ടിയത്. മായങ്കിന്റെ കര്‍ണാടക ടീം സഹതാരവും ഇന്ത്യന്‍ ബാറ്റ്‌സ്മാനുമായ കെഎല്‍ രാഹുലാണ് വിവാഹത്തിന്റെ ചിത്രങ്ങള്‍ ഇന്‍സ്റ്റാഗ്രാം അക്കൗണ്ടിലൂടെ പുറത്തുവിട്ടത്.

ഈ വര്‍ഷം ആദ്യമാണ് മായങ്ക് അഷിതയെ വിവാഹം കഴിക്കാനുള്ള താല്‍പര്യം അറിയിക്കുന്നത്. വിവാഹത്തിനുള്ള സകല ഒരുക്കങ്ങളും ഇരുവരും സോഷ്യല്‍ മീഡിയയില്‍ സ്ഥിരമായി പങ്കുവെച്ചിരുന്നു. ജീവിതകാലം മുഴുവന്‍ കാത്തിരുന്ന ആഘോഷം വന്നെത്തി, ഈ പാര്‍ട്ടിക്ക് തുടക്കം കുറിയ്ക്കാം, ഇതായിരുന്നു മായങ്ക് വിവാഹത്തെക്കുറിച്ച് കുറിച്ചത്.

ആഭ്യന്തര ക്രിക്കറ്റിലെ വിവിധ ഫോര്‍മാറ്റുകളില്‍ 2000 റണ്‍ തികച്ചതോടെയാണ് ഈ വലംകൈയന്‍ ബാറ്റ്‌സ്മാന്‍ ശ്രദ്ധേയനാകുന്നത്. ഇന്ത്യന്‍ ടീമിലേക്ക് പ്രവേശനം സാധ്യമായിട്ടില്ലെങ്കിലും ഇന്ത്യന്‍ എ ടീമില്‍ താരത്തിന് ഇടം ലഭിച്ചിട്ടുണ്ട്. ജൂലൈ 16 മുതല്‍ 19 വരെ ഇംഗ്ലണ്ടില്‍ നടക്കുന്ന നാല് ടെസ്റ്റ് മത്സരങ്ങള്‍ക്കുള്ള ടീമിലാണ് മായങ്കിന്റെ സാന്നിധ്യമുള്ളത്. കരുണ്‍ നായര്‍ നയിക്കുന്ന ഇന്ത്യ എ ടീമിന് ഇന്നിംഗ്‌സിന്റെ തുടക്കത്തില്‍ റണ്ണുകള്‍ സംഭാവന ചെയ്യാനുള്ള ദൗത്യം ഈ ചെറുപ്പക്കാരനാകും.

ആഭ്യന്തര ക്രിക്കറ്റിലെ പ്രകടനം മായങ്കിന് ഐപിഎല്ലില്‍ ആവര്‍ത്തിക്കാന്‍ കഴിഞ്ഞിട്ടില്ല. 11 മത്സരങ്ങളില്‍ നിന്നും 120 റണ്‍ മാത്രമാണ് താരത്തിന്റെ ബാറ്റില്‍ പിറന്നത്. മികച്ച സ്‌കോര്‍ 30 റണ്ണും. ഇംഗ്ലണ്ട് പര്യടനത്തില്‍ മറിച്ചൊരു കഥ രചിക്കാന്‍ കഴിഞ്ഞാല്‍ എ ടീമില്‍ നിന്നുമൊരു പ്രൊമോഷന്‍ ഉറപ്പ്.