വോണുമായി ബെറ്റുവെച്ച ഹെയ്ഡന്‍ വേഷം മാറി ചെന്നൈ തെരുവില്‍; മീശയും താടിയും ഒട്ടിച്ചു

വേഷംമാറി ചെന്നൈ തെരുവില്‍

ചെന്നൈ തെരുവില്‍ ആരും തിരിച്ചറിയാതെ 1000 രൂപയുടെ സാധനങ്ങള്‍ വിലപേശി വാങ്ങണമെന്നായിരുന്നു വെല്ലുവിളി. ഹെയ്ഡന്‍ അത് ഏറ്റെടുത്തു. ഒരു പ്രദേശവാസിയായ പയ്യനെയും ഒപ്പംകൂട്ടി മുണ്ടും വാച്ചും ഉള്‍പ്പെടെയുള്ള ചില സാധനങ്ങള്‍ വാങ്ങി ഹെയ്ഡന്‍ മടങ്ങുകയും ചെയ്തു. പയ്യന് 100 രൂപ താന്‍ നല്‍കിയതായി ഹെയ്ഡന്‍ പിന്നീട് വെളിപ്പെടുത്തി.

കുട്ടികള്‍ക്കൊപ്പം ക്രിക്കറ്റ്

ചെന്നൈയിലെ തെരുവുകളില്‍ കുട്ടികളുമായി ക്രിക്കറ്റ് കളിക്കുന്ന ഹെയ്ഡന്റെ വീഡിയോ കഴിഞ്ഞദിവസം വൈറലായി മാറിയിരുന്നു. ഓസ്‌ട്രേലിയയുടെ എക്കാലത്തെയും മികച്ച ഓപ്പണര്‍മാരിലൊരാളായ താരം ഇന്ത്യയ്‌ക്കെതിരെ മികച്ച റെക്കോര്‍ഡുകൂടി സ്വന്തമായിട്ടുണ്ട്. കളിക്കളത്തില്‍ ഇന്ത്യയുടെ എതിരാളിയായിരുന്നെങ്കിലും വിരമിച്ചശേഷം ഇന്ത്യന്‍ ക്രിക്കറ്റുമായി അടുത്തു പ്രവര്‍ത്തിക്കുന്നു.

ചെന്നൈ സൂപ്പര്‍ കിങ്‌സ് താരം

ആദ്യ മൂന്നു സീസണുകളില്‍ ചെന്നൈയ്ക്കായി ഹെയ്ഡന്‍ 34 ഇന്നിങ്‌സുകളില്‍നിന്നായി 1117 റണ്‍സ് നേടിയിട്ടുണ്ട്. രണ്ടാം എഡിഷനില്‍ തകര്‍പ്പന്‍ ബാറ്റിങ് പ്രകടനം നടത്തിയ ഹെയ്ഡന്‍ 572 റണ്‍സുമായി ഓറഞ്ച് തൊപ്പിയും സ്വന്തമാക്കി. കമന്റേറ്ററായും ക്രിക്കറ്റ് പരിപാടികളിലെ സ്ഥിരം സാന്നിധ്യമായും ഇന്ത്യന്‍ ആരാധകരുമായി അടുത്തബന്ധം പുലര്‍ത്തുന്ന താരം കൂടിയാണ് ഹെയ്ഡന്‍.