സച്ചിനെ സന്ദര്ശിച്ചു
പരിക്കില് നിന്നും മോചിതനായി വരുന്ന പൃഥ്വി ഇന്ത്യയുടെ ബാറ്റിങ് ഇതിഹാസവും ആരാധനാപാത്രവുമായ സച്ചിന് ടെണ്ടുല്ക്കറെ കഴിഞ്ഞ ദിവസം സന്ദര്ശിച്ചു. ബാന്ദ്രയിലെ സച്ചിന്റെ വീട്ടിലെത്തിയാണ് പൃഥ്വി കൂടിക്കാഴ്ച നടത്തിയത്. കളിക്കളത്തിലേക്കു മടങ്ങിവരുന്നതിന് മുമ്പ് സച്ചിന്റെ ഉപദേശം തേടിയാണ് പൃഥ്വി പോയതെന്നാണ് റിപ്പോര്ട്ടുകള്.
സച്ചിന്റെ പിന്ഗാമിയാവാന് ശേഷിയുള്ള താരമെന്നാണ് ക്രിക്കറ്റ് പണ്ഡിതര് വിശേഷിപ്പിക്കുന്നത്. മാത്രമല്ല സച്ചിന്റെ ബാറ്റിങ് ശൈലിയുമായി വളരെയേറെ സാമ്യവും യുവതാരത്തിനുണ്ട്.
സച്ചിന് നേരത്തേ പറഞ്ഞു
പൃഥ്വിയുടെ കഴിവിനെക്കുറിച്ച് സച്ചിന് നേരത്തേ തന്നെ പുകഴ്ത്തിയിരുന്നു. എട്ട്- ഒമ്പത് വയസ്സുള്ളപ്പോള് പൃഥ്വി നെറ്റ്സില് ബാറ്റ് ചെയ്യുന്നത് കണ്ടിട്ടുണ്ടെന്നും വളരെ സ്പെഷ്യലാണ് അവനെന്ന് അന്നു തന്നെ തിരിച്ചറിഞ്ഞതായും സച്ചിന് പറഞ്ഞിരുന്നു. ഇന്ത്യക്കു വേണ്ടി ഭാവിയില് കളിക്കാനുള്ള യോഗ്യതയും പൃഥ്വിക്കുണ്ടെന്ന് സച്ചിന് അഭിപ്രായപ്പെട്ടിരുന്നു.
പരിക്ക് മാത്രമല്ല പ്രശ്നം
ഓസ്ട്രേലിയന് പര്യടനത്തിനിടെ പരിക്ക് മാത്രമല്ല മാനസികമായ ചില പ്രശ്നങ്ങളും പൃഥ്വിയെ അലട്ടിയിരുന്നതായാണ് ചില ദേശീയ മാധ്യമങ്ങള് റിപ്പോര്ട്ട് ചെയ്യുന്നത്. താരത്തിന്റെ കരിയറിനു തന്നെ ഒരുപക്ഷെ ദോഷം ചെയ്യുന്നവയാണ് ഇതെന്നാണ് സൂചന. ഇവയെ എല്ലാം മറികടക്കുകയെന്ന ലക്ഷ്യത്തോടു കൂടിയാണ് പൃഥ്വി സച്ചിന്റെ ഉപദേശം തേടി വീട്ടില് എത്തിയതെന്നും റിപ്പോര്ട്ടില് പറയുന്നു.