രാജസ്ഥാന്‍ മടയില്‍ കൊല്‍ക്കത്ത; റസല്‍ ഷോ കാത്ത് ആരാധകര്‍

റസല്‍ പേടിയില്‍ രാജസ്ഥാന്‍

ആന്‍ഡ്രേ റസലാണ് ഐ.പി.എല്ലിലെ ഇപ്പോഴത്തെ ചര്‍ച്ചാവിഷയം. അവസാന ഓവറുകളില്‍ അനായാസം റണ്‍സ് കണ്ടെത്തുന്ന റസലിന്റെ ബാറ്റിങ് എതിരാളികളുടെ ഉറക്കം കെടുത്തുന്നു. ബംഗളൂരുവിനെതിരായ അവസാന മത്സരത്തില്‍ കൊല്‍ക്കത്ത തോല്‍ക്കുമെന്ന് തോന്നിച്ചിടത്തുനിന്നാണ് റസല്‍ വിജയത്തിലേക്ക് കൊല്‍ക്കത്തയെ കൈപിടിച്ചുയര്‍ത്തിയത്.കൈക്കരുത്തിനനുസരിച്ച് പന്ത് അനായാസമായി അതിര്‍ത്തി കടത്തുന്ന റസലിനെ പിടിച്ചുകെട്ടിയാല്‍ മാത്രമെ രാജസ്ഥാന് വിജയത്തെക്കുറിച്ച് ചിന്തിക്കേണ്ടതുള്ളു. ബാറ്റിങ് നിരയും ബൗളിങ് നിരയും ഒരുപോലെ നിരാശപ്പെടുത്തുന്നു. രഹാനെയുടെ മെല്ലപ്പോക്ക് ടീം സ്‌കോര്‍ബോര്‍ഡിനെ ബാധിക്കുന്നു. മികച്ച സ്‌കോര്‍ കണ്ടെത്തുന്നതില്‍ ബട്‌ലറും പരാജയപ്പെടുന്നു. റസലിനെപ്പോലെ മത്സരഗതിയെ സ്വാധീനിക്കാന്‍ കെല്‍പ്പുള്ള ബെന്‍ സ്റ്റോക്‌സ് രാജസ്ഥാന്‍ നിരയിലുണ്ടെങ്കിലും ഫോമിലല്ല.

സഞ്ജു സാംസണ്‍ സ്ഥിരതയില്ല

സഞ്ജു സാംസണ്‍ ഒരു മത്സരത്തില്‍ സെഞ്ച്വറി നേടിയെങ്കിലും സ്ഥിരതയില്ല. മദ്ധ്യനിരയില്‍ രാഹുല്‍ ത്രിപതി തരക്കേടില്ലാതെ കളിക്കുന്നുണ്ട്. അവസാന മത്സരത്തില്‍ റോയല്‍ ചലഞ്ചേഴ്‌സിനെ തോല്‍പ്പിച്ച ആത്മവിശ്വാസം രാജസ്ഥാനുണ്ടാകും. ജോഫ്ര ആര്‍ച്ചര്‍ പേസ് ബൗളിങ്ങില്‍ മികവുകാട്ടുന്നുണ്ടെങ്കിലും മികച്ച പിന്തുണ ലഭിക്കുന്നില്ല. വരുണ്‍ ആരോണ്‍,ധവാല്‍ കുല്‍ക്കര്‍ണി എന്നിവര്‍ റണ്‍സ് വിട്ടുകൊടുക്കാന്‍ യാതൊരു മടിയും കാട്ടുന്നില്ല.കൃഷ്ണപ്പ ഗൗതമും ശ്രേയസ് ഗോപാലും സ്പിന്‍ ബൗളില്‍ ശോഭിക്കുന്നത് രാജസ്ഥാന് പ്രതീക്ഷ സമ്മാനിക്കുന്നു.

ബാറ്റിങ് കരുത്തില്‍ കൊല്‍ക്കത്ത

ബാറ്റ്‌സ്മാന്‍മാരുടെ ഫോമില്‍ പ്രതീക്ഷ അര്‍പ്പിച്ചാണ് കൊല്‍ക്കത്ത ഇറങ്ങുന്നത്. ആദ്യ മത്സരങ്ങളില്‍ തിളങ്ങാതിരുന്ന ക്രിസ് ലിന്നും താളം കണ്ടെത്തിയതോടെ കൊല്‍ക്കത്തയുടെ കരുത്തുയര്‍ന്നു. ആദ്യ പവര്‍ പ്ലേയില്‍ തല്ലിത്തകര്‍ക്കുന്ന സുനില്‍ നരെയ്ന്‍ നിലയുറപ്പിച്ചാല്‍ എതിര്‍ ടീം ബൗളര്‍മാര്‍ വിയര്‍ക്കും. അനുഭവസമ്പത്തേറെയുള്ള റോബിന്‍ ഉത്തപ്പയ്‌ക്കൊപ്പം ടോപ് ഓഡറില്‍ നിധീഷ് റാണയും തിളങ്ങുന്നു. ദിനേഷ് കാര്‍ത്തികിന് ഫോം കണ്ടെത്താന്‍ സാധിച്ചിട്ടില്ലെങ്കിലും റസലിന്റെ ബാറ്റിങ് ഈ വിടവ് നികത്തുന്നു. യുവതാരം ശുബ്മാന്‍ ഗില്ലിനും പ്രതിഭ പുറത്തെടുക്കാന്‍ അവസരം ലഭിച്ചിട്ടില്ല. കിട്ടിയ അവസരങ്ങളില്‍ തകര്‍പ്പന്‍ ബാറ്റിങാണ് യുവതാരം കാഴ്ചവെച്ചത്.

രാജസ്ഥാന് കടുപ്പമാവും

പീയൂഷ് ചൗളയുടെയും കുല്‍ദീപ് യാദവിന്റെ സ്പിന്‍ ബൗളിങ്ങാണ് എതിര്‍ ടീമിനെ വട്ടം കറക്കുന്നത്. കൃത്യമായ ഇടവേളകളില്‍ വിക്കറ്റ് വീഴ്ത്തുന്നതിലും ഇവര്‍ മികവുകാട്ടുന്നു. യുവ ഫാസ്റ്റ് ബൗളര്‍ പ്രസിദ്ധ് കൃഷ്ണയുടെ അച്ചടമക്കമുള്ള ബൗളിങ്ങിനൊപ്പം ലോക്കി ഫെര്‍ഗൂസണും മികവു കാട്ടുമ്പോള്‍ ജയിക്കുക രാജസ്ഥാന് കടുപ്പമാവും.