ഇന്ത്യ പാക്കിസ്ഥാന്‍ പോരാട്ടം; ആരാധകര്‍ ചരിത്രമെഴുതുമോ? കാത്തിരിക്കുന്നത് വമ്പന്‍ റെക്കോര്‍ഡ്

ടെലിവിഷനുമുന്നില്‍ കളികാണുന്നവര്‍

മാസങ്ങളോളമായുള്ള കാത്തിരിപ്പിനുശേഷമാണ് കളിയെത്തുന്നത്. പുല്‍വാമ ഭീകരാക്രമണത്തെ തുടര്‍ന്ന് ഇന്ത്യ ലോകകപ്പില്‍ പാക്കിസ്ഥാനെതിരെ കളിക്കണമോ എന്ന വിഷയത്തില്‍ വലിയ വിവാദവും ഉയര്‍ന്നിരുന്നു. അതുകൊണ്ടുതന്നെ മത്സരം കാണാന്‍ ടെലിവിഷന് മുന്നില്‍ കോടിക്കണക്കിന് ആളുകള്‍ തയ്യാറായിട്ടുണ്ടാകുമെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.

ഏറ്റവും കൂടുതല്‍ പ്രേക്ഷകര്‍

2011ലെ ലോകകപ്പ് ഫൈനലില്‍ ഇന്ത്യയും ശ്രീലങ്കയും ഏറ്റുമുട്ടിയപ്പോഴായിരുന്നു ഏറ്റവും കൂടുതല്‍ ആരാധകര്‍ കളികണ്ടത്. 558 മില്യണ്‍ ആളുകളാണ് അന്ന് കളി കണ്ടതെന്നാണ് കണക്ക്. രണ്ടാം സ്ഥാനത്തുള്ളത് അതേ ലോകകപ്പിലെ ഇന്ത്യയുടെ സെമി ഫൈനല്‍ മത്സരമായിരുന്നു. പാക്കിസ്ഥാനും ഇന്ത്യയും തമ്മില്‍ നേരിട്ടപ്പോഴെല്ലാം പ്രേക്ഷരുടെ എണ്ണം കണക്കില്ലാതെ വര്‍ധിച്ചിട്ടുണ്ട്.

കോടികളുടെ വരുമാനം

ഇരു രാജ്യങ്ങള്‍ തമ്മിലുള്ള മത്സരത്തിന് സ്‌പോണ്‍സര്‍ഷിപ്പ് വക കോടികളാണ് ഒഴുകുന്നത്. മത്സരം മഴമൂലം മുടങ്ങിയാല്‍ 100 കോടിയോളം രൂപയാണ് നഷ്ടമാകുകയെന്നാണ് കണക്കുകള്‍ വ്യക്തമാക്കുന്നത്. ഇന്ത്യ പാക്കിസ്ഥാന്‍ മത്സരം പതിവുപോലെ ചൂടുപിടിച്ചതോടെ ലോകകപ്പ് സംഘാടകരും ആശ്വാസത്തിലാണ്. മഴമൂലം നാല് കളികള്‍ മുടങ്ങിയതിന്റെ വിമര്‍ശനങ്ങളെല്ലാം ഒറ്റ മത്സരത്തിലൂടെ ഇല്ലാതാക്കാന്‍ കഴിഞ്ഞേക്കും.