ഓസീസിനുമൊരു സച്ചിനുണ്ട്!! വിവാദ നായകനെ മാസ്റ്റര്‍ ബ്ലാസ്റ്ററോട് ഉപമിച്ച് കോച്ച്

ഓസ്‌ട്രേലിയയുടെ സച്ചിന്‍

ഇന്ത്യയുടെ ബാറ്റിങ് ഇതിഹാസം സച്ചിന്‍ ടെണ്ടുല്‍ക്കറോടാണ് സ്മിത്തിനെ ലാങര്‍ ഉപമിച്ചിരിക്കുന്നത്. ഓസ്‌ട്രേലിയയുടെ സച്ചിനാണ് സ്മിത്തെന്ന് അദ്ദേഹം അഭിപ്രായപ്പെട്ടു. നതാന്‍ കോള്‍ട്ടര്‍ നൈലിനെതിരേ സ്മിത്തിന്റെ പ്രകടനം കണ്ടപ്പോഴാണ് സച്ചിനുമായി സാമ്യതകള്‍ തന്റെ ശ്രദ്ധയില്‍ പെട്ടതെന്നും ലാങര്‍ പറഞ്ഞു.
ബ്രിസ്ബണില്‍ ഒരാഴ്ച മുമ്പ് കോള്‍ട്ടര്‍ നൈലിന്റെ ബൗളിങില്‍ അവിശ്വസനീയമായൊരു ഷോട്ട് സ്മിത്ത് കളിച്ചു. ശരിക്കും സച്ചിന്റെ ഷോട്ട് പോലെയായിരുന്നു അതെന്നും ലാങര്‍ വിശദമാക്കി.

മികച്ച പ്രകടനം

വിലക്ക് കഴിഞ്ഞ് ഐപിഎല്ലിലൂടെയാണ് സ്മിത്ത് ക്രിക്കറ്റില്‍ വീണ്ടും സജീവമായത്. രാജസ്ഥാന്‍ റോയല്‍സിനായി മോശമല്ലാത്ത പ്രകടനവും അദ്ദേഹം കാഴ്ചവച്ചിരുന്നു. ലോകകപ്പിനു മുന്നോടിയായുള്ള സന്നാഹ മല്‍സരങ്ങളില്‍ ന്യൂസിലാന്‍ഡിനെതിരേ മികച്ച പ്രകടനമാണ് സ്മിത്ത് പുറത്തെടുത്തത്. ആദ്യ കളിയില്‍ 89ഉം രണ്ടാമത്തേതില്‍ 91ഉം റണ്‍സ് താരം നേടിയിരുന്നു.
ന്യൂസിലാന്‍ഡിനെതിരായ പരിശീലന മല്‍സരങ്ങളില്‍ സ്മിത്തിന്റെ ബാറ്റിങ് ശ്രദ്ധിച്ചിരുന്നു. ബാറ്റിങില്‍ ശരിക്കുമൊരു മാസ്റ്റര്‍ തന്നെയാണ് അദ്ദേഹം. വിലക്ക് മാറി സ്മിത്ത് തിരിച്ചെത്തിയതില്‍ സന്തോഷമുണ്ടെന്നും ലാങര്‍ കൂട്ടിച്ചേര്‍ത്തു.

ലോകകപ്പ് നിലനിര്‍ത്താന്‍ ഓസീസ്

ലോക കിരീടം നിലനിര്‍ത്താനുറച്ചാണ് അഞ്ചു തവണ ചാംപ്യന്‍മാരായ ഓസീസ് ലോകകപ്പില്‍ ഇറങ്ങുന്നത്. ലോകകപ്പിനു മുമ്പ് രണ്ടു സന്നാഹ മല്‍സരങ്ങളില്‍ കംഗാരുപ്പട കളിക്കുന്നുണ്ട്. മെയ് 25ന് ഇംഗ്ലണ്ടിനെ നേരിടുന്ന ഓസീസ് രണ്ടു ദിവസം കഴിഞ്ഞ് ശ്രീലങ്കയുമായും ഏറ്റുമുട്ടും.
ലോകകപ്പില്‍ ഓസീസിന്റെ ആദ്യ എതിരാളികള്‍ ചെറുടീമായ അഫ്ഗാനിസ്താനാണ്. ജൂണ്‍ ഒന്നിനാണ് അഫ്ഗാനുമായി ഓസീസ് ശക്തി പരീക്ഷിക്കുന്നത്.