Click it and Unblock the Notifications
സിഎസ്‌കെയ്ക്കു സസ്‌പെന്‍ഷന്‍
2013ലാണ് വാതുവയ്പ്പുമായി ബന്ധപ്പെട്ടു സിഎസ്‌കെ പ്രതിക്കൂട്ടിലാവുന്നത്. ഇതേ തുടര്‍ന്നു ടീമിനെ രണ്ടു വര്‍ഷത്തേക്കു ബിസിസിഐ സസ്‌പെന്‍ഡ് ചെയ്യുകയും ചെയ്തിരുന്നു. ഇതേ തുടര്‍ന്നു ധോണിയുള്‍പ്പെടെയുള്ള സിഎസ്‌കെ ടീമിലെ മുഴുവന്‍ താരങ്ങള്‍ക്കും പുതിയ തട്ടകത്തിലേക്കു ചേക്കേറേണ്ടി വന്നിരുന്നു. കഴിഞ്ഞ സീസണില്‍ സസ്‌പെന്‍ഷന്‍ കഴിഞ്ഞുള്ള മടങ്ങിവരവ് കിരീടവിജയത്തോടെയാണ് ധോണിയും സിഎസ്‌കെയും ആഘോഷിച്ചത്.
വാതുവയ്പ്പുമായി ബന്ധപ്പെട്ട് അന്നു കൂടുതല്‍ വിവരങ്ങള്‍ പുറത്തുവന്നപ്പോള്‍ ശരിക്കും ഷോക്കായിരുന്നു. എന്നാല്‍ ടീമിനെ രണ്ടു വര്‍ഷത്തേക്കു സസ്‌പെന്‍ഡ് ചെയ്യാനുള്ള നടപടി തന്നെ അമ്പരപ്പിച്ചുവെന്ന് ധോണി പറയുന്നു.
കൊലപാതകത്തേക്കാള്‍ വലുത്
വാതുവയ്‌പ്പെന്നത് തന്നെ സംബന്ധിച്ചിടത്തോളം കൊലപാതകത്തേക്കാള്‍ വലിയ കുറ്റമാണെന്നു ധോണി ചൂണ്ടിക്കാട്ടി. ഇന്ന് താന്‍ എന്താണോ, എന്തൊക്കെ നേട്ടങ്ങള്‍ കൈവരിച്ചോ അവയ്‌ക്കെല്ലാം കാരണം ക്രിക്കറ്റാണ്.
അതുകൊണ്ടു തന്നെയാണ് വാതുവയ്‌പ്പെന്നത് കൊലപാതകത്തേക്കാള്‍ വലിയ കുറ്റമാണെന്ന് പറയുന്നത്. കൊലപാതകം ചെയ്താല്‍ പോലും തനിക്ക് വാതുവയ്പ്പില്‍ പങ്കാളിയാവാന്‍ കഴിയില്ലെന്നും ധോണി വ്യക്തമാക്കി. ലഭിക്കുന്ന വലിയ വരുമാനം മുന്നില്‍ കണ്ട് ആളുകള്‍ വാതുവയ്പ്പ് നടത്തിയാല്‍ ക്രിക്കറ്റിന്റെ വിശ്വാസ്യതയാണ് നഷ്ടപ്പെടുകയെന്നും അദ്ദേഹം ചൂണ്ടിക്കാട്ടി.
അപ്രതീക്ഷിത ഫലങ്ങള്‍
ടെസ്റ്റിലും നിശ്ചിത ഓവര്‍ ക്രിക്കറ്റിലുമെല്ലാം ചില ത്രസിപ്പിക്കുന്ന മല്‍സരങ്ങളുണ്ടാവാറുണ്ട്. ചിലപ്പോള്‍ അപ്രതീക്ഷിത മല്‍സരഫലങ്ങളുമുണ്ടാവാം. അത്തരം മല്‍സരങ്ങള്‍ ചിലപ്പോള്‍ പലര്‍ക്കും വിശ്വസിക്കാന്‍ കഴിഞ്ഞെന്നു വരില്ല. അപ്പോഴാണ് കളിയില്‍ വാതുവയ്പ്പ് നടത്തിട്ടുണ്ടാവാമെന്ന തരത്തില്‍ ആരാധകര്‍
ആരോപണങ്ങള്‍ ഉന്നയിക്കാറുള്ളത്.
2013ലെ ഐപിഎല്ലില്‍ തന്റെ ടീമായ സിഎസ്‌കെ വിലക്ക് നേരിട്ടതു പോലൊരു മോശം അനുഭവത്തിലൂടെ ഇനിയൊരിക്കലും കടന്നു പോവേണ്ടി വരില്ലെന്നും ധോണി മനസ്സ്തുറന്നു.
