രോഹിത് ശര്മയും മിച്ചല് സ്റ്റാര്ക്കും
ഇന്ത്യന് ഓപ്പണര് രോഹിത് ശര്മയും ഓസ്ട്രേലിയന് ഓപ്പണിങ് ബൗളര് മിച്ചല് സ്റ്റാര്ക്കും തമ്മിലായിരിക്കും പ്രധാന ഏറ്റുമുട്ടല്. കഴിഞ്ഞമത്സരത്തില് സെഞ്ച്വറി നേടിയ രോഹിത്തും അഞ്ചു വിക്കറ്റ് പ്രകടനം നടത്തിയ സ്റ്റാര്ക്കും മിന്നുന്ന ഫോമിലാണ്. സ്റ്റാര്ക്കിന്റെ സ്വിങ്ങുകള്ക്കും യോര്ക്കറുകള്ക്കും രോഹിത്തിന് മറുപടിയുണ്ടാകുമോ എന്ന് കാത്തിരുന്ന് കാണേണ്ടിവരും. ഇതുവരെയായി രോഹിത് സ്റ്റാര്ക്കിന്റെ 51 പന്തുകള് നേരിട്ടിട്ടുണ്ട്. 48 റണ്സും സ്വന്തമാക്കി. ഒരുതവണ പേസര്ക്ക് മുന്നില് കീഴടങ്ങുകയും ചെയ്തു.
ശിഖര് ധവാനും പാറ്റ് കുമ്മിന്സും
മറ്റൊരു ഇന്ത്യന് ഓപ്പണറായ ശിഖര് ധവാനും ഓസീസ് ബൗളര് പാറ്റ് കുമ്മിന്സും തമ്മില് നേര്ക്കുനേര് വരുമ്പോള് ആര്ക്കാണ് മേല്ക്കൈ ലഭിക്കുകയെന്നതും ആരാധകര് ഉറ്റുനോക്കുന്നു. കുമ്മിന്സിനെതിരെ 39 പന്തില്ന്നും 46 റണ്സ് നേടിയിട്ടുണ്ട് ധവാന്. എന്നാല് രണ്ടുതവണ പുറത്താവുകയും ചെയ്തു. അതുകൊണ്ടുതന്നെ ഇവര്തമ്മിലുള്ള ഏറ്റുമുട്ടല് ആവേശകരമാകും.
വിരാട് കോലിയും നഥാന് കോള്ട്ടര് നില്ലും
വിരാട് കോലി ബാറ്റ് ചെയ്യാനെത്തുമ്പോഴേക്കും നഥാന് കോള്ട്ടര് നില് ആയിരിക്കും ബൗളര് എന്നാണ് കരുതുന്നത്. കോള്ട്ടര് നില്ലിനെതിരെ കോലിക്ക് മികച്ച റെക്കോര്ഡ് ഇല്ല. 71 പന്തുകള് നേരിട്ടപ്പോള് 47 റണ്സ് മാത്രമാണ് കോലിക്ക് നേടാനായത്. മാത്രമല്ല, മൂന്നു തവണ കോലി കോള്ട്ടര് നില്ലിന്റെ പന്തില് പുറത്താവുകയും ചെയ്തിട്ടുണ്ട് എന്നതിനാല് ഇന്ത്യന് ആരാധകര്ക്ക് ചങ്കിടിപ്പേറ്റുന്നതായിരിക്കും ഇവരുടെ പോരാട്ടം.
ഡേവിഡ് വാര്ണറും ജസ്പ്രീത് ബുംറയും
ഓസീസ് നിരയിലെ വെടിക്കെട്ട് ഓപ്പണര് വാര്ണറെ എത്രയും വേഗം പുറത്താക്കിയാല് ഇന്ത്യയ്ക്ക് കളിയില് മേധാവിത്വം നേടാം. ജസ്പ്രീത് ബുംറയിലാണ് ഇന്ത്യയുടെ പ്രതീക്ഷ. ബുംറയ്ക്കെതിരെ 42 പന്തില് നിന്നും വാര്ണര് 41 റണ്സ് നേടിയിട്ടുണ്ട്. ബുംറയ്ക്ക് ഇതുവരെ വാര്ണറെ പുറത്താക്കാന് കഴിഞ്ഞിട്ടുമില്ല. ബുംറയെ വാര്ണര് ഏതു രീതിയിലാകും കൈകാര്യം ചെയ്യുകയെന്നതും ആരാധകര് ഉറ്റുനോക്കുന്നു.
സ്റ്റീവ് സ്മിത്തും യുസ് വേന്ദ്ര ചാഹലും
വെസ്റ്റിന്ഡീസിനെതിരെ നിര്ണായക അര്ധ സെഞ്ച്വറി നേടിയ സ്റ്റീവ് സ്മിത്ത് മികച്ച ഫോമിലാണ്. സ്മിത്തിനെതിരെ യുസ്വേന്ദ്ര ചാഹല് ഫലപ്രദമാകുമോ എന്ന് കണ്ടറിയണം. ചാഹലിന്റെ 37 പന്തില് നിന്നും സ്മിത്ത് ഇതുവരെയായി 20 റണ്സാണ് നേടിയത്. ദക്ഷിണാഫ്രിക്കയ്ക്കെതിരെ 4 വിക്കറ്റുകള് വീഴ്ത്തിയ ചാഹലിന്റെ പ്രകടനം ഇന്ത്യയെ സംബന്ധിച്ചിടത്തോളം നിര്ണായകവുമാകും.