ലോക ചെസ്: വീണ്ടും സമനില

മോസ്‌കോ: ലോക ചെസ് ചാംപ്യനെ കണ്ടെത്താനുള്ള പോരാട്ടത്തില്‍ സമനിലകളുടെ പെരുമഴ. ഇസ്രായേല്‍ താരം ബോറിസ് ഗെല്‍ഫാന്‍ഡും ഇന്ത്യയുടെ വിശ്വനാഥന്‍ ആനന്ദും തമ്മിലുള്ള പോരാട്ടം ഒമ്പതാം റൗണ്ടിലെത്തിയപ്പോള്‍ ഇരുവരും 4.5 പോയിന്റുമായി ഒപ്പത്തിനൊപ്പമാണ്. ഒമ്പത് മത്സരങ്ങളില്‍ രണ്ടെണ്ണമൊഴികെ ബാക്കിയെല്ലാം സമനിലയിലാണ് അവസാനിച്ചത്.

ഒമ്പതാം റൗണ്ടില്‍ 49 നീക്കത്തിനൊടുവിലാണ് സമനില വഴങ്ങിയത്. കറുത്ത കരുക്കളുമായി കളിക്കാനിറങ്ങിയ ആനന്ദ് എതിരാളിക്കെതിരേ കടുത്ത പ്രതിരോധമാണ് തീര്‍ത്തത്. മത്സരത്തില്‍ നേരിയ മുന്‍തൂക്കം നേടിയ ആനന്ദ് പത്താം റൗണ്ടില്‍ വെള്ളക്കരുക്കളുമായി വിജയം നേടാനാകുമെന്ന പ്രതീക്ഷയിലാണ്.

തുടക്കത്തില്‍ മത്സരം ഗെല്‍ഫാന്‍ഡിന് അനുകൂലമായിരുന്നു. പക്ഷേ, ആനന്ദിന്റെ വിചിത്രമായ ചില നീക്കങ്ങള്‍ കളിയുടെ ഗതി മാറ്റി മറിച്ചു. 40ാം നീക്കമാകുമ്പോഴേക്കും ആനന്ദ് പ്രതിരോധത്തിന്റെ ശക്തമായ ഒരു കോട്ട തന്നെ കെട്ടിയുണ്ടാക്കിയിരുന്നു. ക്വീനിനെ തന്നെ ബലികൊടുത്തുകൊണ്ടുള്ള ആനന്ദിന്റെ നീക്കങ്ങള്‍ ഗെല്‍ഫാന്‍ഡിനെ പലപ്പോഴും വട്ടംകറക്കി.