ജെറ്റര്‍ 100മീറ്ററിലെ റാണി

ദെയ്ഗു: ലോകത്തിലെ ഏറ്റവും വേഗമേറിയ ഓട്ടക്കാരി അമേരിക്കയുടെ കാര്‍മെലിറ്റ ജെറ്റര്‍. ദക്ഷിണകൊറിയയിലെ ദെയ്ഗുവില്‍ നടക്കുന്ന ലോകചാംപ്യന്‍ഷിപ്പില്‍ 10.90 സെക്കന്റില്‍ ഫിനിഷ് ചെയ്താണ് ജെറ്റര്‍ വേഗത്തിന്റെ റാണിയായത്.

ജമൈക്കയുടെ വെറോണിക്ക കാംപെല്‍ ബ്രൗണ്‍ 10.97 സെക്കന്റില്‍ ഓടിയെത്തി വെള്ളിക്ക് അവകാശിയായപ്പോള്‍ 0.01 സെക്കന്റുകള്‍ പിറകിലായി നിലവിലെ ചാംപ്യനും ട്രിനിഡാഡ് ആ ന്റ് ടൊബാഗോ താരവുമായ ഷെ ല്ലി ആന്‍ ഫ്രെയ്‌സര്‍ക്ക് മൂന്നാംസ്ഥാനം കൊണ്ട് തൃപ്തിപ്പെടേണ്ടിവന്നു.

കഴിഞ്ഞ കുറെ കാലമായി ഇതിനായി കഷ്ടപ്പെടുകയായിരുന്നു. ജമൈക്കന്‍ താരങ്ങളുടെ മുന്നേറ്റം തടയാനായാല്‍ സ്വര്‍ണം ലഭിക്കുമെന്നുറപ്പായിരുന്നു. കോച്ച് ജോണ്‍ സ്മിത്തിന്റെ കഠിനപ്രയത്‌നം തന്നെയാണ് സ്വര്‍ണത്തിലേക്ക് നയിച്ചത്-മല്‍സരശേഷം ജെറ്റര്‍ വ്യക്തമാക്കി. കഴിഞ്ഞ രണ്ട് ലോകമീറ്റിലും ജമൈക്കന്‍ താരങ്ങളാണ് സ്വര്‍ണം നേടിയത്. മികച്ച പ്രകടനം കാഴ്ചവയ്ക്കാന്‍ സാധിച്ചു. ലണ്ടന്‍ ഒളിംപിക്‌സിനുള്ള മുന്നൊരുക്കത്തിന് ഈ സ്വര്‍ണം കൂടുതല്‍ ആവേശം പകരും.