മാര്‍ച്ച്‌ പാസ്റ്റ്‌:അജ്ഞാതയെ തിരിച്ചറിഞ്ഞു

ലണ്ടന്‍: ഒളിംപിക്‌സ്‌ ഉദ്‌ഘാടനചടങ്ങിനോടനുബന്ധിച്ച്‌ നടന്ന മാര്‍ച്ച്‌ പാസ്റ്റില്‍ പങ്കെടുത്ത അജ്ഞാത യുവതിയെ തിരിച്ചറിഞ്ഞു. ബാംഗ്ലൂര്‍ സ്വദേശിയായ മധുര ഹണി എന്ന യുവതിയാണ്‌ ഏറെ അഭ്യൂഹങ്ങള്‍ക്ക്‌ കാരണമായ ഈ അജ്ഞാത യുവതി എന്ന്‌ ഇവരുടെ സുഹൃത്തുക്കള്‍ തന്നെയാണ്‌ തിരിച്ചറിഞ്ഞത്‌.

തനിക്ക്‌ ഒളിംപിക്‌സ്‌ പാസ്‌ ലഭിച്ച കാര്യം ഫെയ്‌സ്‌ബുക്കിലൂടെ ഹണി സുഹൃത്തുക്കളെ നേരത്തെതന്നെ അറിയിച്ചിരുന്നു. ഇന്ത്യന്‍ സംഘാംഗം അല്ലാത്ത ഒരു അജ്ഞാത ഒളിംപിക്‌സ്‌ മാര്‍ച്ച്‌ പാസ്റ്റില്‍ ഇന്ത്യന്‍ സംഘത്തിനൊപ്പം ഏറ്റവും മുന്നില്‍ തന്നെ നടന്നത്‌ ഏറെ വിവാദവായിരുന്നു.

കടും ചുവപ്പും, നീലയും വേഷത്തില്‍ കാണപ്പെട്ട ഇവര്‍ കൂട്ടത്തില്‍ നിന്നും എടുത്തു കാണപ്പെട്ടിരുന്നു ഹണി. എന്നാല്‍ ഇങ്ങൊനൊരാള്‍ എങ്ങനെ ഇന്ത്യന്‍ സംഘത്തില്‍ കടന്നു കൂടി എന്ന്‌ ആര്‍ക്കും ഒരു ഊഹവും ഇല്ലായിരുന്നു.

മാര്‍ച്ച്‌ പാസ്റ്റില്‍ ഇന്ത്യന്‍ പതാകയേന്തിയ ഗുസ്‌തി താരം സുശീല്‍ കുമാറിന്റെ തൊട്ടടുത്ത്‌ വലതു വശത്തായാണ്‌ ഹണി നടന്നത്‌. ഏതായാലും സംഭവം സംബന്ധിച്ച്‌ ഇന്ത്യ ഒളിംപിക്‌സ്‌ സംഘാടകരോട്‌ സംഭവത്തെ കുറിച്ച്‌ വിശദീകരണം തേടിയിട്ടുണ്ട്‌.