റോജേഴ്‌സ് കപ്പ്: യാങ്കോവിക് പുറത്ത്

ടൊറന്റോ: റോജേഴ്‌സ് ടെന്നിസ് ടൂര്‍ണമെന്റില്‍ നിന്ന് ടോപ് സീഡ് താരങ്ങള്‍ ആദ്യറൗണ്ടില്‍ പുറത്തായി. മുന്‍ ലോകഒന്നാം നമ്പര്‍ താരം യെലേന യാങ്കോവിക്, ഫ്രാന്‍സിന്റെ മരിയന്‍ ബര്‍ടോളി, റഷ്യയുടെ സ്വത്‌ലേന കുസന്തസോവ എന്നിവരാണ് തുടക്കക്കാര്‍ക്കുമുന്നില്‍ നിഷ്പ്രഭരായത്.

ജര്‍മനിയുടെ ജൂലിയ ജോര്‍ജസ് 6-1, 6-3നാണ് യാങ്കോവിക്കിനെ മുട്ടുകുത്തിച്ചത്. ഇതിനു മുമ്പ് രണ്ടു താരങ്ങളും ഏറ്റുമുട്ടിയപ്പോള്‍ ഒരു സെറ്റ് പോലും നേടാന്‍ ജോര്‍ജസിനു സാധിച്ചിരുന്നില്ല.

യെലേനയെ പോലൊരു താരത്തിനെതിരേ ഏറ്റുമുട്ടുക ബുദ്ധിമുട്ടാണ്. കഠിനമായി പോരാടി. അതുമാത്രമാണ് മുന്‍ ലോകഒന്നാം നമ്പര്‍ താരത്തിനെതിരേ ഞാന്‍ ചെയ്തത്-മല്‍സരശേഷം ജര്‍മന്‍ താരം പറഞ്ഞു.

ലോകഒമ്പതാം നമ്പര്‍ താരമായ ബട്രോളിയെ 6-3, 6-3 എന്ന സ്‌കോറില്‍ കസാക്കിസ്താനില്‍ നിന്നുള്ള ഗലിന വോസ്‌കോബോവയാണ് കീഴടക്കിയത്.