പ്രവീണിന് പരിക്ക്; ശ്രീശാന്തിന് സാധ്യത?

മുംബൈ: ലോകകപ്പിന് രണ്ടാഴ്ച ബാക്കിനില്‍ക്കെ ഇന്ത്യന്‍ ടീം പരിക്കിന്റെ പിടിയില്‍. ദക്ഷിണാഫ്രിക്കന്‍ പര്യടനത്തിനിടെ കൈയ്ക്ക് പരിക്കേറ്റ ഫാസ്റ്റ് ബൌളര്‍ പ്രവീണ്‍ കുമാര്‍ ലോകകപ്പില്‍ കളിക്കുന്ന കാര്യം സംശയത്തിലാണ്. ഏതു വിക്കറ്റിലും മൂവ്‌മെന്റ് കണ്ടെത്താന്‍ കഴിയുന്ന പ്രവീണിന് കളിക്കാന്‍ കഴിഞ്ഞില്ലെങ്കില്‍, ലോകകപ്പില്‍ ഇന്ത്യയ്ക്ക് വന്‍ തിരിച്ചടിയാകും. എന്നാല്‍, ബിസിസിഐയോ മറ്റ് ടീം അധികൃതരോ ഇതേക്കുറിച്ച് പ്രതികരിച്ചിട്ടില്ല.

സഹീര്‍ ഖാന്‍, മുനാഫ് പട്ടേല്‍, ആശിഷ് നെഹ്‌റ എന്നിവരാണ് പതിനഞ്ചംഗ ടീമിലെ മറ്റു പേസര്‍മാര്‍. പ്രവീണ്‍ ഫിറ്റ്‌നസ് തെളിയിക്കുന്നതില്‍ പരാജയപ്പെട്ടാല്‍ 30അംഗ സാധ്യതാ ടീമില്‍ ഉള്‍പ്പെട്ട മറ്റു പേസര്‍മാരില്‍ ആര്‍ക്കെങ്കിലും അവസരം നല്‍കിയേക്കും. അങ്ങനെ വന്നാല്‍ മലയാളി പേസര്‍ എസ്. ശ്രീശാന്തിനു തന്നെയാവും കൂടുതല്‍ സാധ്യത. ഇഷാന്ത് ശര്‍മയും പരിഗണിക്കപ്പെട്ടേക്കാം.

അതിനിടെ പ്രവീണ്‍ കുമാര്‍ വിദഗ്ദ്ധ ചികിത്സയ്ക്കായി ലണ്ടനിലേയ്ക്ക് പോകുമെന്ന് റിപ്പോര്‍ട്ടുകളുണ്ട്. ഇംഗ്ലണ്ടില്‍ ചികിത്സ നടത്തുന്ന ഡോക്റ്റര്‍മാരുടെ നിരീക്ഷണമനുസരിച്ച് പ്രവീണിന്റെ ഭാവി നിര്‍ണയിക്കപ്പെടും. ദക്ഷിണാഫ്രിക്കന്‍ പര്യടനത്തിനിടെ കൈമുട്ടിനാണ് പ്രവീണ്‍ കുമാറിന് പരുക്കേറ്റത്.

സച്ചിന്‍ തെന്‍ഡുല്‍ക്കര്‍, വീരേന്ദര്‍ സേവാഗ്, ഗൗതം ഗംഭീര്‍ തുടങ്ങിയ ഇന്ത്യയുടെ മുന്‍നിരതാരങ്ങളെയും പരിക്ക് അലട്ടുന്നുണ്ട്.